Буз къала хазыр болургъа кёп къалмагъанды

Нальчикде Буз къаланы къурулушу башланнганлы иги кесек заман озгъанды. Анда ишле къыстау барадыла; тёрт минг квадрат метрлик объект битерге алай кёп къалмагъанды. Бюгюнлюкге анда кёп заты хазырды. Специалистле аны битеу инженер коммуникацияларын жарашдыргъандыла, жылытхан системасын да орнатхандыла. Шёндю уа отоуланы къабыргъаларын къалай турадыла, ток ызланы тартадыла эмда хауа бла жалчытхан оборудованияны хазырлайдыла. Экинчи этажында отоу тюплерин бетон къуюп тюзетедиле. Аны бла бирге къаланы арбазында мадар этиледи, тыш къабыргъалары да жасалана турады.

Айтханларына кёре, бу объектде бек тынгылы эришиуле бардырыргъа боллукъду. Анда спортну хоккей, керлинг, бузда учуу тюрлюлери бла кюреширге жарарыкъды. Ишле белгиленнген болжалындан алгъа барадыла; хар нени да быйылны ахырына бошаргъа дейдиле, ызы бла Къала хайырланыугъа берилликди.