Эм узун миллет жаяу жол

«КИФ 2024» форумда «Кавказны жаяу жоллары бла. Тенгизден тенгизге дери тау жолла бла» деген сессия болгъанды. Анга къатышханла жангы законопроектни къалай толтургъанларыны, къаллай чурумлагъа тюбегенлерини юслеринден билдиргендиле. Къабарты-Малкъарны атындан анга курортла эм туризм министрни орунбасары Шауаланы Ислам къатышханды.

Ала айтханларыча, Шимал Кавказда жаяу туризмге сейир ёсе барады, бусагъатда Миллет Кавказ жол да жарашдырылады. Ол Къара тенгизден башланып Каспийге дериди. Трекингни, альпинизмни, маданият эм экология туризмни сюйгенле ол ахшы башламчылыкъды. Кеси да эм узун миллет жаяу жол боллукъду, битеулю узунлугъу 3300 километрди, Шимал Кавказны битеу республикаларыны, Краснодар крайны жерлери эм энчи сакъланнган 13 табийгъат жерле бла ётеди. 

Къабарты-Малкъар аны къурауда уллу магъананы тутады, табийгъат жолланы айбатландырыу жаны бла «Кавказ. РФ» биригиу бла 2022 жылдан бери байламлыкъда ишлейди, деп билдиредиле республиканы Курортла эм туризм министерствосундан.