Келишимге къол салыннганды

«Титан» компанияны къаууму (Омск шахар) Къабарты-Малкъар къырал университет бла стратегиялы байламлыкъланы юсюнден келишим этгенди. Аны мураты уа билим бериу, жангычылыкъ, илму-техника, инжиниринг, эксперт-аналитика, усталыкъгъа тюшюндюрюу амалланы бирикдирип, бирге хайырлы эмда жетишимли ишлеу бла байламлыды.

КъМКъУ-ну илму-тинтиуле иш жаны бла проректору Светлана Хаширова стратегиялы айныуну баш магъанасы къыралны нефтехимиялы комплексини конкурентлени арасында базыныулу эмда ышаныулу болуру бла байламлылыгъын ангылатханды. Андан сора да, стратегия жаны бла къыйматлы бёлюмлеге бийик технологиялы полимерледен продукцияны бюгюннгю излемлерине тийишлиликде чыгъарыу болгъанын да билдиргенди. «Титан» а къыралны ол жаны бла жалчытылыууна аслам юлюш къошханын, аны бла бирге уа Россейни бийик окъуу юйлери эмда илму организациялары бла байламлыкъланы бютюн кенгерте, кючлей да баргъанын айтханды.

Къабарты-Малкъар къырал университет «Титан» компанияны къаууму бла байламлыкъны чеклеринде Псковда инжиниринг араны ачылыууна да тири къатышыр муратдады. Ол а химиялы промышленность бёлюмде жангы, бюгюнгю сурамларына келишген продуктланы жарашдырыргъа эмда аланы хайырланыуну кёбейтирге онг берликди. Аны бла бирге уа полимерлени къурау жаны бла башха хайырлы эмда жетишимли проектлени башларгъа онг боллукъду.

КъМКъУ «Титанны» экология жаны бла къоркъуусуз болгъан бийик технологиялы химиялы продуктланы жарашдырыу бла байламлы илму-техника проектин жашауда бардырыугъа тири къатышады. Ала уа къурулушда, саулукъ сакълауда, аш-азыкъ промышленностьда, машиналагъа керекли затланы ишлеуде хайырланыладыла. Кеслери да углеводородлу сырьёдан жангычы ата журтлу тинтиулени мурдорларында къураладыла.

«Титанны» бёлюмюню башчысы Александр Орлов а этилген келишим компаниягъа келир заманда илму-технологияла жаны бла тынгылы тутхучлукъ боллугъун белгилегенди. Бюгюнлюкде къыралда инженер усталыкълары бийик даражада болгъан, хунерли профессионалла керек болуп тургъанларын эсгертгенди. Аланы КъМКъУ бла байламлыкълары компанияны ёсерине эмда айнырына себеплик этеригин, университетде бу ызлада билим алгъанлагъа ахшы онгла берлигин да чертгенди.

Проектни жашауда бардырыуну чеклеринде 2026 жылгъа ата журтлу катализаторланы чыгъарыр мурат барды. Аланы мурдорларында уа экология жаны бла къоркъуу болмагъан танг кесек затны жарашдырыр акъылдадыла.