Туристни жашауун сакъларгъа онг чыкъмагъанды

Таула къоркъуулу жер болгъанларыны юсюнден дайым эсгертилгенлей турады. Бюрсюкюн МЧС-ни жер-жерли бёлюмюне Ирик-Чат ауузда Беларусь Республикадан турист къауумдан болушлукъ тилеп билдириу келгенди. Анда айтылгъаныча, 1990 жылда туугъан эр киши къаядан юзюлюп, саулугъуна чып тюшгенди. Тохташдырылгъаныча, турист къауум онтёрт адамдан къуралгъанды, ала жолоучулукъларын МЧС-де эсепге салмагъандыла. Къутхарыучула олсагъатлай жолгъа чыкъгъандыла. Жарсыугъа, ала ачыгъаннга жетгинчиге дери, ол ёлгенди. Аны табып чыгъарыугъа онбеш сагъат кетгенди.     

Экинчи кюн а Тонгуз-Орун кёлню къатында 3100 метр бийикликде турист, жыгъылып, аягъын ачытханыны юсюнден билдиргендиле. Къутхарыучула терк жетип, тиширыугъа биринчи болушлукъну этгендиле, энишге тюшюргендиле. Медикле айтханларыча, аны жашаууна къоркъуу жокъду.

Бу болумла бла байламлы МЧС туристлени таулада сакъ болургъа, къоркъуусузлукъну жорукъларына уллу кёллюлюк этмезге, жолоучулукъларын эсепге салыргъа чакъырады.