Нальчикде Туристни юйю

Нальчикде Лермонтов эмда Шогенцуков атлы орамланы мюйюшюнде тургъан юй, республиканы ара шахарында кёзге уруннган эмда ариуладан бириди. КъМР-ни Архив службасындан билдиргенлерине кёре, аны къурулушу Уллу Ата журт урушха дери башланнганды. Проектин а совет архитектор Людмила Тимонина жарашдыргъан эди.

Ал заманда ол «Туристни юйю» деген атны жюрютгенди. Кеси да 500 жерли къонакъ юйча ол халда къуралгъан эди. Анда хар отоуда 6-8 адам жашаргъа боллукъ эди. Юч къатлы, анда ашханасы, медицина бёлюмю, чач къыркъгъан отоуу, башха хар неси да бар эди. Ол эшиклерин 1939 жылда ачханды, биринчи къонакъланы да алып башлагъанды.

Уллу Ата журт уруш башланнганда уа, бу юйде 4425 номерли госпиталь ачадыла. Анда жаралы совет аскерчиле багъыуну ёте эдиле.

Немислиле Къабарты-Малкъаргъа киргенлеринде, шахарда кёп уллу объектленича, бу юйню къадары да аллай болады – ала аны чачып, от салып кетгендиле. Алай мекям тюп болуп къалмагъанды, насыпха, аны жангыртыр амал бар эди. Анга уа он жыл керек болгъанды.

Жылла да бара, юй да жангы сыфат алып тебирейди. Нальчикни депутатланы шахар Советини исполкомуну оноуу бла Туристни юйю 1954 жылда эшиклерин жангыдан ачханды. Архитектор Любовь Тимонина аны тыш сыфатына жангы затла, балконла да къошханды, башын а жити этгенди. Аты уа энди «Нальчик» турбазагъа тюрленип, тарыхха алай киргенди.

Архитектор эгечле – Людмила эм Любовь Тихонинала къурагъан мекям шахарны бюгюнлюкде да айбатлы этип турады.