Заранлы ханс сабанланы бийлеп барады

Россельхознадзорну Шимал Кавказда управлениясы саулай округда, ол санда Къабарты-Малкъарда да фитосанитария болумгъа кёз-къулакъ болгъанлай турады. Ведомствону келечилери тинтиуле бардыргъан кезиуде заранлы битимле къалайда эмда неллай бир ёсгенлерин тохташдырадыла, аны бла байламлы эсгертиуле да этедиле.

Ма алай, алгъаракъда мониторинг этгенлеринде ала, бизни республикада жаланда июнь айда амброзия деген заранлы ханс энтта да 824 гектар сабанлада ёсгенин кёргендиле. Аны да къошуп тергегенде уа, бу зат бюгюнлюкде 113 минг гектарда табылгъанын чертгендиле. Аны бла байламлы 116 карантин тийре барды. Ол жерлени иелерине бек къаты эсгертиуле этиледиле.

Управленияны специалистлери дагъыда Россельхоз ара бла байламлыкъда ишлейдиле. Аны чеклеринде ала Россейде карантиннге тийишли болмагъан, алай бизден мирзеу сатыугъа жиберилген тыш къыраллада уа аллайгъа саналгъан битимле ёсген жерлени ачыкълайдыла. Аны ючюн а, тыш рынокладан къуру къалмаз ючюн, аллай затла ёсген жерледе мадар этерге кереклисин белгилейдиле. Башхача айтханда,  мирзеуде аллай зат болмазгъа керекди. Ол себепден сабанланы иелеринден мадар этерлери изленеди.