«Баш борчубуз – жаш тёлюню спорт бла кюреширге юйретиудю»

Элбрус район не заманда да спортчула бла бай болгъанды. Жыл сайын ала республиканы спорт хазнасына кёп тюрлю саугъала бла майдалла келтиредиле. Тырныаууз шахарны тренерлерини араларында жаш тёлюге кесин сюйдюралгъан, атын да иги бла айтдыргъан тренер Этезланы Владимирди. Бюгюн аны бла ишинде жетишимлерини, кемчиликлерини юсюнден да болгъанды ушагъыбыз.

– Владимир, сен спортха къалай келгенсе?

– Сабийлигимден спорт бла кюрешиуню бек жарата эдим. Биринчи атламларымы «Геолог» спорт комплексде карате-до секцияда башлагъан эдим. Андан бери 34 жыл озгъанды. Саулай бир ёмюр деяллыкъма. Ол заманда биринчи тренерим Артур Владимирович Байбеков эди. Билген затларына мени керти да кёлю бла юйретирге кюрешгенди ол.

Жылдан-жылгъа, ёсе баргъаным сайын, спортда да сынамым айный эди. Адам бир ишни сюйюп толтурса, жетишимли болмай къалмайды. Дагъыда манга къыйын салгъан тренерлени сагъына, С.В. Криваковскийни, Е.А. Могилевецни, О.А. Цойну, М.А. Думанишевни, З.З. Пшуковну хурмет бла эсгериучюме. Алай аскер тюйюшлени искусствосуна терен юйретген а белгили япон уста Хитоши Касуя болгъанды. Бусагъатда каратени WKC тюрлюсюнден дунияны, Азияны толу контактлы каратеден чемпионума, каратени WKC тюрлюсюнден россей эм битеудуния эришиулени, къатыш единоборстволаны призёрума, аскер самбодан да алчыланы санындама.

– Тырныауузгъа уа къачан къайтханса? Мында ишни къалай башлагъанса?

– Сюйген шахарыма 2017 жылда къайтханма. Ол мен мында болмагъан он жылны ичинде жаш тёлюню спортха сууугъанын сезген эдим, бегирекда аскер искусстволагъа. Сора, атам бла, юйюрюм бла да кенгешип, мында каратеден секция ачаргъа таукелленеме. Ма алай бла «Барс-Тырныауз» деген спорт клубну ишлетип башлайма. Беш жылдан а, даражабыз тюрленип, Аскер тюйюш искусстволаны коммерциялы болмагъан «Барс-Тырныауз» деген акционер биригиу болгъанбыз.

– Не бла байламлы эди ол тюрлениу?

– Биринчиден, бизге кёп жангы тренер келгени бла байламлыды: Арсен Губашиев, Алим Эмминов, Гияс Абушов, Ангелина Лазаренко, Виолетта Шпанагель. Бизни академияда каратени кёп тюрлюсюне юйренир онг болгъаны себепли келген сабий къыйналмай, кесини жаны тартхан тюрлюсюн сайлар онгу болуп, бизни уллу эм жарашыулу юйюрюбюзге къошуладыла. Сабийлени бла жаш тёлюню спорт бла кюреширге сейирлерин къозгъау бизни харкюнлюк борчубузду.

– Бусагъатда сизге кёп сабий келемиди?

– Хау, аланы саны 160-ха жууукъду. Андан да кёп келлик эдиле, жарсыугъа, жарау этген залыбыз асыры гитчеден, сыйындыралмай къыйналабыз, аны себепли бизге жазылыргъа кюн сайын келген сабийлени алалмайбыз. Къысха заманны ичинде бу жарсыуубузну да тюзетирбиз деп ышанама.

– Ахча бла жалчытыу уа не халдады?

– Букъдурмай айтайым, бек керекли сорууну сордугъуз. Жарсыугъа, махтанырча тюйюлдю хал. Жаппуланы Магомет таматалыкъ этген Физкультура эм спорт жаны бла комитет къолундан келгенича болушады. Анга жюрек ыразылыгъымы билдире, ыспас этерге сюеме. Бизни аты айтылгъан футболчу жашыбыз Аппайланы Хызыр, «Кавказ» тюкенибизни таматасы Теммоланы Мухтар, КъМР-ни жаш тёлю ишлени жаны бла министр Азамат Люев хар заманда да тилеклерибизге, уллу кёллю болмай, болушургъа кюрешедиле. Кёбюсюнде бизни эришиулеге къатышыуларыбызны къоранчларын ата-анала бла тренер къауумубуз тёлейдиле. Аны ючюн, бирде, фахмулу спортчуларыбызны чыгъаралмайбыз эришиулеге.

– Озгъан жылда уа къаллай жетишимлеригиз болгъандыла?

– Мени оюмума кёре, иги жетишимле этгенбиз. Алчы спортчуларыбызны бир къауумуну атларын энчи чертип айтыргъа сюеме: Жолабланы Сафия, Ангелина Лазаренко, Абдуллах Нуралиев, Габоланы Дамир, Этезланы Мансур, Хамид Алхасов. Бу спортчула каратени кёп тюрлюлеринден Битеуроссей биринчиликледе, регионла аралы бардырылгъан эришиуледе да хорлап, биринчи жерлеге тийишли болгъандыла. Ёхтемленип айтама быланы юсюнден.

Озгъан жылны эсеплегенде, академиябыз Элбрус районнга 276 майдал келтиргенди. Аладан 97-си 1-чи жерле ючюн, 91-и 2-чи жерле ючюн, 88-и да 3-чю жерле ючюндюле. ММА-дан 11 чемпион бел баула, беш битеукъауумлу кубок, тёрт кубок да эм иги техника ючюн алгъанбыз. Аладан сора да Ангелина Лазаренко сау жылны ичинде эришиуледе хорламлары ючюн 340 минг сом къоллу болгъанды. Мени оюмума кёре, жаш спортчулагъа ол бек иги болушлукъду.

– Сизни къууандыргъан дагъыда не затды ишигизде?

– Бизге быйыл атлары айтылгъан къонакъла келгени бек къууандыргъанды. Не да болсун, сени тутхан ишинге, болдургъан жетишимлеринге да аллай адамланы эс бургъанлары ёхтемлендиреди. КъМР-ни жаш тёлю ишлени жаны бла министр Азамат Люев келип, сабийле бла да танышып, алагъа эс буруп къууандыргъанды. Россейден «Karate Combat» лигасыны дунияда биринчи чемпиону Тебуланы Мырза-Бек къарындашы Тау-Бек бла, Элбрус районну Жаш тёлю палатасыны таматасы Этезланы Малика, ММА-дан, Аскер самбодан бла грепплингден Москваны бла Москва областьны чемпиону Рамазан Дадуев бизде къонакъда болгъандыла. Академиябызны ишине быллай адамланы сейирлери болгъаны, сёзсюз, къууандырады. Мындан ары да ишибизге кёл салып, сыйлары жюрюген къонакъланы да къатышдыра турурбуз деп ышанама. Жетишимлерибизге эс буруп тургъан журналистлерибизге да ыспас этеме. Барыбыз да бирге, ёсе келген тёлюбюзню тамбласы болур ючюн биригип кюрешебиз.