Эки жанына да хайырлы болурму?

Къырал Думаны къараууна исси кюнде урунуу заманны къысхартыуну юсюнден законну проекти берилгенди. Алай быллай оноу айлыкъны азайтыргъа боллугъун айтадыла экспертле.

Думаны башчысыны орунбасары Борис Чернышов къызыуда ишчини тилеги бла урунуу болжалны бир сагъатха азайтыргъа боллугъуну юсюнден законну проектни хазырлагъанды. Алгъаракълада уа Роспотребнадзор ишчи отоуда хауаны жылылыгъы 28,5 градусха жетгенде, кондиционер жокъ эсе, ишчи кюнню бир сагъатха, 29 градусдан озгъан кезиуде уа эки сагъатха азайтыргъа кереклисини юсюнден жорукъланы чыгъаргъанын айтырчады. Алагъа кёре, отоуда къызыулукъ 30,5 градусдан да ёрге кётюрюлсе, ишчи кюн тёрт сагъатха къысхартылыргъа керекди.

Роспотребнадзор ачыкъ хауада ишлегенлени юслеринден да къайгъыргъанды: хауа 32,5 градусдан къызса, 10-15 минут ишлеп, ызы бла 10-12 минутну сериуюн жерде солургъа керекди. Быллай ишлеге 25 жылдан гитчелени эм 40 жылдан таматаланы тартыргъа жарамайды. Дагъыда ведомство хауа 30 градусдан къызыу болса, сагъатны ичинде 0,5 литр суу ичерге кереклисин да айтады.

Къысхасы, Чернышов Роспотребнадзорну жорукъларын законнга бурур муратлыды. Ол акъыл этгенича, бу излемлени Урунуу кодексге кийирирге керекди. Ол айтханыча, бюгюнлюкде закон болмагъаны ючюн, иш бериучюлеге урунуу заманны къысхарталмай, ишлени тыяргъа, бу заман ючюн да хакъ тёлерге тюшеди. «Къызыу кюнде урунуу болжалны бир сагъатха къысхартыу эки жанына да хайырлыды», - деп акъыл этеди депутат.

 Болсада бир-бир экспертлени айтханларына кёре, бу жорукъ кийирилсе, компанияла айлыкъны азайтырыкъдыла. Аны бла бирге ингирде, кюн сериуюннге бурулгъанда, кёпле тириледиле, бу заман бютюнда хайырлыды, дейдиле экспертле. 

 Бардырылгъан сорууладан ачыкъланнганыча, къыралда хар тёртюнчю инсаннга къызыу кезиуде ишлеген къыйынды, жылны бу заманында кёпле ыйыкъгъа тёрт кюнню ишлерге да ыразыдыла. Дагъыда кондиционерлени хатасындан ишде даулашла кёбейгенлерин да айтадыла соруугъа къатышханла.