Эм иги журналистле саугъаланнгандыла

КъМР-ни асламлы информация органларында Парламентни ишин бек иги ачыкълагъан журналист ишлени конкурсуну эсеплери ачыкъ этилгендиле. Ол республиканы законла чыгъарыучу органыны 30-жыллыгъына аталып къуралгъанын айтырчады. Саугъалау бу кюнледе Парламентни мекямында бардырылгъанды.

Журналистлени алгъышлай, спикер Татьяна Егорова конкурсха сейир уллу болгъанын, анга тюрлю-тюрлю оюмланы ачыкълагъан ишле берилгенлерин белгилегенди. 

– Анга къатышханлагъа барысына да ыразылыгъымы айтыргъа сюеме, хорлагъанланы уа жюрегимден алгъышлайма. Саугъалауну бардыра, сизни жууаплы эм къыйын ишигиз ючюн ыразылыгъымы энтта бир кере айтыргъа сюеме. Мындан ары да быллай хайырлы байламлыкъла жюрютюллюклерине ышанама, – дегенди спикер.

Татьяна Борисовна журналистле бардыргъан ишни хайырындан республиканы жамауаты, андан тышында регионлада да законла чыгъарыучу органны юсюнден билим алыргъа онглары болгъанын айтханды. «Биз жарашдыргъан документле республиканы социал-экономикасыны ышаннгылылыгъын жалчытыугъа, адамларыбызны къолайлыкъларын ёсдюрюуге, ырахматлы жашауларын къураугъа бурулупдула. Сиз а, ишчи, солуу кюндю деп къарамай, бизни бла биргесиз, Парламентни юсюнден керти, не жанындан да толу статьяла жазасыз», – деп къошханды Татьяна Егорова эмда мындан ары да окъуучулагъа хурметлик бла ишлерге, намыслы, тюзлюклю болургъа чакъыргъанды.

– Профессионал билимигиз, тирилигигиз, чыгъармачылыкъ хунеригиз ючюн ыспас этеме. Мындан ары да жетишимле, мамырлыкъ, тынчлыкъ тежейме, – дегенди спикер.

Ызы бла саугъалау башланнганды.   Алай бла «Басма органлада КъМР-ни Парламентини ишини юсюнден миллет тилледе эм иги материал» бёлюмде «Кабардино-Балкарская правда», «Адыгэ псалъэ» эм «Заман» республиканы газетлени редакцияларыны редакторлары Марьяна Белгорокова, Луиза Богатырева эм Тикаланы Фатима хорлагъандыла. 

«КъМР-ни Парламентини юсюнден эм иги видеосюжет» бёлюмде алчы Битеуроссей къырал телерадиокомпанияны «Къабарты-Малкъар» бёлюмюню корреспонденти Кючмезланы Лейля алчы болгъанды. 
«КъМР-ни Парламентини юсюнден телевиденияда эм иги бериу» бёлюмде «Къабарты-Малкъар» миллет телеканалны «Жангылыкъла» бериулени бардыргъан Марьяна Долова саугъаланнганды. 
«КъМР-ни Парламентини юсюнден эм иги радио бериу» бёлюмде уа Битеуроссей къырал телерадиокомпанияны «Къабарты-Малкъар» филиалыны бериулерин бардыргъан Санят Озрокова бла «КБР-Медиа» къырал учрежденияны радиосуну информация бериулерин бардыргъан Сюйдюмланы Динара хорлагъандыла. 

Интернетде законла чыгъарыучу органны юсюнден жазгъанланы арасында «КБР-информ» информация агентствону келечиси Юлия Верниковскаяны ишлери эм игилеге саналгъандыла.

Конкурс комиссия энчи саугъала да тохташдыргъанды. Анга «Къабарты-Малкъар» телеканалны бериулерин бардыргъан Самара Саральпова «Тарыхны бетлери: Къабарты-Малкъарны законла чыгъарыучу власть органы» документли кино ючюн тийишли болгъанды. Дагъыда энчи саугъа «Кабардино-Балкарская правда» газетни корреспонденти Эдуард Битировха да берилгенди – тюрлю-тюрлю жыллада депутат къуллукъну толтургъанла бла ушакълары ючюн.

Кёп жылланы бет жарыкълы уруннганы эм жетишимлери ючюн КъМР-ни Башчысыны бла Правительствосуну пресс-службасыны информация бла жалчытыу управлениясыны эксперти Альберт Хановха КъМР-ни Парламентини Сыйлы грамотасы берилгенди. Татьяна Егорова аны сынауун, фахмусун белгилеп, ыразылыгъын айтханды. 

Тюбешиуню ахырында Татьяна Борисовна законла чыгъарыу ишни, Парламентни полномочияларыны, инсанладан келген тилеклени юслеринден къысха айтханды. 

Конкурсда хорлагъанлагъа дипломла, ахча эм эсде къаллыкъ саугъала берилгендиле.