Бирге ишлеуню къыйматы

Къалмукъну Гарантияла фондуну башчысы Чингис Ванькаев эмда ол республиканы «Мени бизнесим» арасыны таматасыны орунбасары Олег Битов бу кюнледе Къабарты-Малкъарда болгъандыла. Мында ала предпринимательликге себеплик этиу бла кюрешген учрежденияланы келечилери бла тюбешгендиле, деп билдиргендиле КъМР-ни «Мени бизнесим» арасындан.

«Бизни республикада экономика эмда сатыу-алыу министр Андрей Чиджиевни буйругъу бла тюрлю-тюрлю продукция чыгъарыучулагъа тышындан алыучуланы излеу иш барады», - дегенди Ванькаев.

Тюбешиуге КъМР-де «Мени бизнесим» араны башчысы Хадис Дударов, республиканы гитче эмда орта предпринимательлик бла кюрешгенлени эм аз ёлчемли кредитле бла онгдургъан фондуну башчысы Мечиланы Камиль, КъМР-ни социал бёлюмде инновацияланы арасыны таматасы Османланы Залина, экспортха себеплик этиу араны таматасы Абидова Хадижа да къатышхан эдиле. Ала къонакъла бла бирге арада эки жанына да хайырлы байламлыкъла къурауну юсюнден сёлешгендиле, шарт атламланы да белгилегендиле. Жыйылыуда айтылгъаныча, этиллик мадарла эки регионнга да файдалы боллукъдула.