Солуу тынчлыкълы ётерча

Жай солуу кезиу къыстау барады, алай эсе уа, жол кёргюзтюучюлени  эм тилманчланы болушлукъларын кёпле излейдиле. Аны бла байламлы Къабарты-Малкъарны Курортла эм туризм министерствосу солугъанланы жолгъа жангызда сынауладан ётген гидле бла чыгъаргъа кереклисин эсгереди.

Жолгъа чыгъа туруп, ала атлары, тукъумлары,  усталыкъларыны юсюнден шартла эм туристлеге керекли башха билдириуле жазылгъан белгилени жюрютюрге керекдиле. Анда борчлу халда QR-код да салынады, аны болушлугъу бла экскурсовод кертиси бла аттестацияны ётгенин бла къалгъанын бир къырал тизмеде кёрюрге боллукъду. 

Алгъаракълада Россейни Президенти атлары бир къырал тизмеге кийирилмеген гидлеге бла экскурсоводлагъа ишлерин 2025 жылны 1 мартына дери бардырыргъа эркинлик берген законнга къол салгъанды. Бусагъатда республиканы Курортла эм туризм министерствосунда аланы аттестацияны ётерге онглары барды. Анда экзаменни жетишимли бергенле тизмеге кийириледие, алагъа энчи белги бла электрон халда аттестат бериледи. Бу иш «РФ-де туризм ишни тамамлауну юсюнден» законну чегинде «Туризм эм къонакъбайлыкъны къурау» миллет проектде салыннган борчланы толтурууну чегинде бардырылады.