Жорукълагъа оюн халда тюшюндюрюу

Жаш тёлюню кюнюнде «Каббалкэнерго» компанияны келечилери Нальчикде ара паркда бардырылгъан фестивальгъа къатышхандыла. Ол кюн анда кёп предприятие кеслерини тийречиклерин, мюйюшлерин, тематика майданчыкъларын жарашдыргъан эдиле. Юйретиу, суратлау, спорт эм башха жумушлагъа къадар адам къатышханды. Къуру энергетикле къурагъан бёлюмледе жарым мингден артыкъ адам болгъанды, деп билдиргендиле компанияны пресс-службасындан.

Энергетикле майданчыкъларыны хар биринде да энчи бир жумушну тамамлагъандыла. Сёз ючюн, биринде, ток ургъан адамгъа биринчи болушлукъ берирге юйрете эдиле. Тренажёр-роботну юсюнде хар атламны жик-жиги бла кёргюзтюрге эмда ангылатыргъа онг болгъанды. Айтылгъаннга эс буруп тынгылагъан бир-бир къонакъла кеслерин къутхарыучулача сынап кёрген эдиле.

«Жарыкъ» майданчыкъны къонакълары да заманларын хайырлы ётдюргендиле, дерге боллукъду. Ала электрокючню къоркъуусуз хайырланыуну жорукъларын къалай билгенлерин туура этгендиле, электросхема жыйып да кёргендиле. Программаны эм зауукълу кесегинде уа сабийле къагъытда келир кезиулени энергетикасы къаллай болгъанын суратлап кёргюзтюрге кюрешгендиле.

«Быллай жумушла энергетиканы сфераны магъанасын ачыкъларгъа болушадыла, бери жаш тёлюню тартыргъа себеплик этедиле. Энергетикни ишини юсюнден быллай оюн халда айтылса, анга гитче тёлю бютюнда къулакъ салады», - дегенди компанияны ишчиле алыу жаны бла тамата специалисти Жанна Вологирова.