УФСБ: Сауутланы тюрлендирип, сатып тургъандыла

Аманлыкълагъа къажау излеу-тинтиу жумушланы толтургъан кезиуде РФ-ни ФСБ-сыны КъМР-де Управлениясыны къуллукъчулары, РФ-ни МВД-сыны Шимал Кавказда Баш управлениясыны келечилери бла бирге регионла аралы къуралгъан аманлыкъчы къауумну бузукъчу ишлерин тыйгъандыла. Ала, 2020-2021 жыллада сауутлагъа тюрлениуле кийирип, ала атдырырча этип, ызы бла сатып тургъандыла.

 Нальчикни шахар сюдю аманлыкъчы къауумну келечилери Россейни УК-сыны 222-чи статьясыны 3-чю кесегине, 223-чю статьясыны 3-чю кесегине бузукълукъла этгенлерин тохташдыргъанды. Алай бла В. Амировну эркинлигин 4 жылгъа бла 6 айгъа сыйырыргъа, аны битеулю низамлы колонияда тутаргъа эмда 350 минг сом тазир салыргъа деген оноу чыгъарылгъанды. И.  Махмудов келир 4 жылны бла 2 айны битеулю низамлы колонияда ётдюрлюкдю, ол да 350 минг сом тёлерге борчлу этилгенди. И. Хамдиев битеулю низамлы колонияда 3 жылны бла 6 айны тутуллукъду, ол да къыралгъа 350 минг сом тёлерикди. В.Цветаевни эркинлигине 4 жылгъа бла 6 айгъа чекле салынадыла, ол да битеулю низамлы колонияда тутуллукъду эмда 350 минг сом тазир тёлерикди. Е. Чеботаревни эркинлигин сюд 6 жылгъа бла 6 айгъа сыйыргъанды. Ол а къаты низамлы колонияда тутуллукъду. Анга салыннган тазирни ёлчеми 404 минг сомгъа жетеди.