Битеуроссей олимпиада кюннге аталып - эришиуле

 Онбешинчи битеуроссей олимпиада кюннге аталып республиканы Олимпиада совети, Спорт министерствосу, физкультура эм спорт жаны бла жер-жерли самоуправление органла бла бирге эришиуле къурагъандыла.

Къабарты-Малкъарны битеу 13 районунда да спортну сюйгенле эм аны бла профессионал халда кюрешгенле садакъдан атдырыуда, футболда, гитче-футболда, баскетболда, дзюдода, грек-рим эм эркин тутушууда, стол теннисде, велоспортда, жип тартыуда эм спортну дагъыда талай тюрлюсюнде сынашхандыла. Эришиуле ётдюрюлген майданланы асламы Нальчикде болгъандыла: «Спартак» стадион, Олимпиадада хорлагъанланы аллеясы, «Нальчик» спорт ара, «Кюнлю шахарны» стадиону эм башхала.  Алагъа битеу да 7 минг адам къатышхандыла, ол санда сабийле, абаданла, школ эм спорт лагерьледе солугъанла, чекленнген онглары болгъанла да. Эришиулени къууанчлы халда ачылыуларына уа администрацияланы башчылары, белгили спортчула, Олимпиада оюнланы призёрлары, спортну ветеранлары да келгендиле. Эришиулени эсеплерине кёре, хорлагъанлагъа кубокла, майдалла, дипломла, спорт керекле эм энчи саугъала берилгендиле.