Фатарны чеклерин тюрлендирирге сюе эсегиз

Апрельни аллында кёп къатлы юйледе къабыргъаланы тепдириу, отоуланы чеклерин тюрлендириу бла байламлы жангы жорукъла кийирилгендиле. Аны бла байламлы Роскадастрны регионда бёлюмюню ишчилери бу жумушну законнга бузулукълукъ этмей къалай толтурургъа боллугъун ангылатхандыла.

«Тепдирилмеген мюлкню эсепге салыуну юсюнден» федерал законнга эм РФ-ни жашау журт кодексине кийирилген тюрлениулеге кёре жашаугъа жараулу юйню жашаугъа жараусуз къауумгъа кёчюрюу, фатарда отоуланы тюрлендириу жумушла тынчыракъ тамамланырыкъдыла. Бёлюмню юрисконсультанты Владислав Озермегов айтханнга кёре, эндиге дери фатарны чеклерин тюрлендириуге анда къабыргъаланы кёчюрюу эм техника паспортха тюрлениулени кийириу саналгъанды. Бусагъатда бу ангыламгъа къабыргъаланы не азчыкъ да кёчюрюу, отоуланы ёлчемлерин тюрлендириу, фатарда жангы отоула ишлеу да киредиле. Жангы низам законда жазылгъанны бютюн толуракъ эм даулашлы кезиуле чыкъмазча этеди. Сора, бусагъатда фатарда этилген тюрлениулени Тепдирилмеген мюлкню бир къырал тизмесине да кийирирге керекди, алгъа уа ала жангызда техника къагъытлада жазылып къалгъандыла. Ала тюз да эсепге салыннганлай, бу иш тамамланылып бошалгъаннга саналады.

Фатарда тюрлениулени, экспертле юйретгенлерича, законодательствогъа бузукълукъ этмегенлей, жер-жерли самоуправление органдан эркинлик алып башларгъа керекди. Аны ючюн битеу керекли къагъытланы, ол санда этиллик тюрлениулени юсюнден заявленияны, аланы проектлерин, техника паспортну, фатаргъа ие болгъаныгъызны юсюнден шагъатлыкъ документлени жыйышдырыргъа керекди. Роскадастрны бёлюмюню баш юрисконсульту Ирина Карданова билдиргенича, тюрлениуле этиллик фатар хаух алыуну социал тюрлюсюнде эсе, заявитель юйюрню битеу келечилеринден ыразылыкъларын жаздырып алыргъа борчлуду. Ол кезиуде узакъда болгъанладан да. Жер-жерли самоуправление орган заявитель келтирмеген документлени алыргъа излесе, аланы тапдырыргъа керекди. Андан ыразылыкъны алгъандан сора, ишлени башларгъа боллукъду. Аланы бошагъанлай, техника планны да къошуп, аны юсюнден эркинлик берген органнга билдирирге тийишлиди. Тюрлениуледен сора фатаргъа жангы отоула къошулгъан эселе, инсан тепдирилмеген мюлкге ие болгъанына эсепге тюшгенине къырал тазир тёленнгенини юсюнден данныйле да изленирикдиле.      

Роскадастрда тюрлениулени проектин, техника планни энчиликлери неде болгъанын да ангылатхандыла. Алай бла тюрлениулени проектин инженерле инсанны эскизине, техника паспортха, къурулуш жорукълагъа кёре жарашдырадыла. Техника планны уа кадастр инженер Тепдирилмеген мюлкню бир къырал тизмесине кийирирча хазыр этеди. 2024 жылны майындан башлап ол жангызда электрон халда толтурулады.