Эл мюлк биригиулени кёбейтирге

Къабарты-Малкъарны Жамауат палатасында «Эл мюлкде кюрешгенлеге битеулю болушлукъ этиу эм эл мюлк биригиулени айнытыу» регион проект къалай тамамланылгъанын сюзгендиле.

Палатаны Агропромышленный комплексни айнытыу, табийгъатны сакълау эм экология жаны бла комиссиясыны башчысы Юрий Колесников белгилегенича, проектде айтылгъан мадарла бусагъатда къыралны жанындан болушлукъ этиуню чегинде жарашдырылгъандыла. Эл мюлк министерствону финансла-экономика бёлюмюню башчысы Алим Калмыков билдиргеннге кёре, быйыл проектни болжалы тауусулады, декабрьде аны эсеплери чыгъарыллыкъдыла.

- 2023 жылда ведомствону эм энчи предпринимательлени, эл мюлк биригиулени, эл мюлк кооперацияланы арасы бла 95,14 миллион сомгъа 24 келишим тауусулгъанды. Бардырылгъан конкурслада 18 мюлкге «Агростартапха» кёре федерал эм республика бюджетледен 55,880 сом грант ахча берилгенди. 5 кооператив бла аланы иш бла байламлы къоранчларыны кесегин къайтарырча 34,21 миллион багъасы субсидияны алырча келишимлеге къол салыннганды. Алай бла къыралны жанындан быйыл да алагъа себеплик этилликди, - дегенди ол.

Элбрус районну мюлк байламлыкъла, жерлени хайырланыу эм эл мюлк жаны бла управлениясыны таматасы Ахматланы Илияс айтханыча, районда эсепде 26 эл мюлк барды. 2023 жылда «Эл мюлкде уруннганлагъа болушлукъ этиу эм эл мюлк агломерацияны айнытыу» регион проектге кёре къыралны жанындан болушлукъну жангыз биреулен алгъанды. «Къабарты-Малкъар Республикада эл мюлкню айнытыу, эл мюлк продукцияны рыногуна къарау» къырал программаны чегинде 21 мюлкге болушлукъ этилгенди. «Администрация производительледен жерлени бериуню юсюнден келген тилеклеге заманында къарайды, 2017 жылдан башлап алагъа хаух 15 участка берилгенди», - деп къошханды ол.

Лескен районну эл мюлк, промышленность эм сатыу-алыу управлениясыны таматасы Амурбек Барсоков чертгенича, аланы гитче эм орта бизнесни айнытырча Къабарты-Малкъарда предпринимательствону айнытыу ара бла келишимлери барды, ангылатыу-информация иш тынгылы къуралгъанды. Аны хайырындан эл мюлкде уруннганла эм бу ишге сейирлери болгъанла къыралны жанындан къаллай болушлукъ этилгенини юсюнден кеч къалмай билаладыла. «Агростартапны» чегинде уа арт 5 жылны ичинде гитче предпринимательствода уруннганлагъа 32 миллион чакълы 25 субсидия берилгенди.

Этилген докладла бла байламлы комиссияны келечиси Шауаланы Артур сют чыгъаргъан эм малчылыкъ бла кюрешген мюлклеге ахча болушлукъну кёбейтирге тийишлисин, элледе жашагъан адамланы иш бла жалчытырча эл мюлклени кёбейтирге кереклисин айтханды. Анга жууап бере, Эл мюлкде уруннганланы союзуну башчысы Инал Алакаев аланы 35-чи жыйылыуларында битеу бу соруула кётюрюлгенлерин, Эл мюлк министерство битеу жангылыкъланы билдирирге, уруннганла къырал болушлукъну битеу тюрлюлери бла хайырланалырча информацияны заманында алыргъа керек болгъанларын чертгенди.