Жол айбат эм къоркъуусуз болурча![]() Арт жыллада Къабарты-Малкъарда солургъа сюйгенлени санына танг къошула барады. Ол себепден турист маршрутлагъа сурам уллулай къалады. Чегем чучхурлагъа, Чирик кёллеге, Бызынгыгъа эм башха жерлеге барыргъа сюйгенле кёпдюле. Аны бла байламлы тау жолла къоркъуусуз болурча аслам эс бурулады. Жыл сайын «Къоркъуусуз эм тынгылы автомобиль жолла» миллет проектге кёре, республикада аслам иш тамамланады. Аны кезиуюнде инженер сооружениялагъа эм башха объектлеге да къаралады. Андан сора да, алагъа терк-терк кёз-къулакъ болургъа ташдан, топуракъдан тазаларгъа керекди. Быйыл эм магъаналы проектледен бирине Экинчи Чегем-Булунгу жолну санаргъа боллукъду. Мында ишле жаз башындан бери барадыла. Бюгюнлюкде подряд организацияны келечилери Чегем чучхурладан Булунгугъа дери жолну кенгертип, черек жагъаланы кючлеп, асфальт салып кюрешедиле. Ишле болжалдан кеч къалмай тамамланырларын Республиканы Башчысы дайым эсепде тутады. Саулай алып айтханда, объектни уллулугъу 27 километрге жетеди. Алгъаракълада Чегем чучхурланы тийресинде эки километр чакълы бирде тийишли ишлени иги кесеги толтурулгъанды. Аны кезиуюнде суу таламазча, черек жагъаланы бетон къабыргъала къуюп кючлегендиле эм жолну да иги кесекге кенгертгендиле. Бусагъатда уа подряд организацияны келечилери жардан таш топуракъ оюлмазча бетондан къабыргъала къуюп кюрешедиле. Ишлени асламысы Чегем чучхурланы бла Булунгуну эм Эл-Тюбюню арасында 25 километр тенгли бир жерде барадыла. Мында да черек жагъаланы кючлейдиле, жардан таш, топуракъ оюлмазча мадар этиледи эм эски коммуникацияланы алышадыла. Ызы бла специалистле жолну мурдорун жарашдырып, тротуарла салып, къоркъуусузлукъну жалчытырча аберилени да тохташдырып башларыкъдыла. Булунгу бла Эл-Тюбю элледе бир минг чакълы адам жашайды. Болсада Нальчикге, Чегем шахаргъа барыр ючюн, мындагъыла жаланда бу жолну хайырланадыла. Аны бла бирге ол шарт туристлени санына къошулурча да ахшы себеплик этерикди. Жол къыйын тау жерде орналгъаны себепли, объектни 2026 жылгъа бошар умут этиледи.
Поделиться:
Читать также:
12.02.2025 - 16:08 →
Тёлеуледе – жангы жорукъла
12.02.2025 - 13:59 →
«ЗАМАННЫ» алыр онг барды
10.02.2025 - 12:20 →
«ЗАМАННЫ» тёрт ай алыргъа онг барды
07.02.2025 - 09:28 →
«Заманнга» жазылыргъа онг барды
07.02.2025 - 08:08 →
Агъачны айнытыугъа алланып
|