«Юлгю алгъан адамларым-юйюрюмдедиле»

Быйыл школну жетишимли бошагъан, сынамланы иги белгилеге бералгъан окъуучуларыбызны юслеринден къууанып жазабыз. Алагъа уллу эс бергенибизни сылтауу  ала бизни насыплы тамблабызны ышаныулары болгъанындады.

Этезланы Джаннет Тырныаууз шахарны 5-чи номерли гимназиясында онбир жылны хар дерсден да алчы болуп окъугъанды. Алай ол бек уллу жетишимди деп, тынчайып къаллыкъладан  тюйюлдю ол. Жашауунда сайлагъан усталыгъында кюн сайын кесин тохтаусуз айнытыуну, билимин ёсдюрюуню излейди. Андан сора да, Джаннетни оюмуна кёре, адам улу не къадар умут этип, аланы толтурургъа итине эсе, ол къадар насыплы эм магъаналы жашайды. Аны алыкъа керти атламлары, ахшы муратлары алда болгъанын белгилейди.

Жетишим деген сёзню хар адам  кесича ангылайды. Школчуну юсюнден айтханда, ол жаланда бир тюрлю эришиуде хорлап, аны бла чекленип къалыу болмайды. Онбир жылны ичинде кёп тюрлю жарсыуладан, къууанчладан, да ётюп, кёп кере, жукъудан тоймай дерслеге барып, алай бла жуукълашханды Джаннет кесини  даражасына. Салыннган ахшы муратха жетер ючюн, адам, эм алгъа кесин низамгъа келишдирип, арыгъанына да къарамай, жыгъылса да, къоба, абынса да, кеси кючюне бла акъылына таяна, барыргъа керекди.

Онбиринчи классны бошай тургъан сабийле жылны ахыранда бек къыйналадыла. Сабийлени саулукъларына,  психологиялары жанына да  заран тюшеди. Къырал сынауланы бере туруп не иги окъугъанла да жарсыйдыла. Алай, не десек да, окъугъан сабий бла окъумагъан бирча ётмейдиле аладан. Алчы къыз, эсин башха затлагъа бёлмей, дерслерине алай тынгылагъанды, хазырланнган да алай этгенди.

- Муратыма жетер ючюн, манга къанат кергенле, билеклик этгенле да юйюрюм болгъандыла. Юлгю алыр адамларым да юйюрюмдедиле. Кёз аллымда врачланы экинчи тёлюсю къуралады. Абадан эгечим жетишимли юристледен бири болгъанды. Мен аны бла бек ёхтемленеме. Абадан къарындашым а хар заманда да  кючюме ийнандыргъан, акъылыма ышандыргъан  бек къаршы адамымды. Ала  юлгюлеримдиле. Бирлерибиз адамланы жашауларын къутхара эселе, бирлерибиз а аланы эркинликлерин, праволарын къоруулайдыла. Дагъыда, билим алыуну, чынтты специалист болуп, хайыр келтириуню баш борчха санагъан юйюрде ёсгеним да уллу насыбымды, - дейди Джаннет.

Тырныауузну 5-чи номерли гимназиясы республиканы эм иги школларындан бирине саналады. Аны себепли, анда ишлеген устазла бийик категориялы,  методика жаны бла кючлюле, билимлиле болгъанлары ючюн окъууда болдургъан жетишимлерин мени жигитим ала бла байлайды. Гимназияда окъургъа сюйгеннге не жаны бла да аламат онгла къуралгъанын да ёхтемленип айтады ол. Алчы окъуучуну сабийлигинден да акъыл сёз бла ёсдюрген аппасы болгъанды. Башланнган классларын эсгере уа, Джаннет ол заманда бир-бир  дерслени окъуу программада артыкъ суннганын бюгюн уяла айтады. Энди ангылагъанды ол: адамны жашаугъа тюз ниети, кёз къарамы толу къуралыр ючюн, аны не жаны бла да айнытыргъа кереклисин. Эстетика, этика жаны бла дерсле, сурат ишлеу, физкультура, технология-была бары да ол  айныугъа себеплик этедиле.

Джаннет кесине иш усталыкъны сайлай туруп, иги сагъышланнганды. Тарых бла байламлы дерслеге сюймеклиги уллу болгъаны ючюн, юрист болургъа излейди. Абадан эгечича, бийик билим алып, аламат урунургъа  муратлыды. Сайлаууна уа ол  бир кере окъуна сокъуранмагъанды, оюмун да тюрлендирмегенди.

Окъуу жылларында къыз  кёп тюрлю олимпиадалагъа къатыша келгенди. Алай  тарыхдан олимпиаданы уа эсинде бегирек сакълайды. Анда  сайлагъан усталыгъыны ёзеги болгъан дерсден кесини билимин сынаргъа онгу болгъаны ючюн дю ол.

- Тенглерим барысы да ахшы умутла бла бошайдыла школну. Хар бири да сайлагъан усталыкъларына тюшерлерин тилейме. Аны ючюн ала уллу кюч салып кюрешгенлерин кесим кёргенме. Биз аламат специалистле болуп, аллыбызгъа салыннган борчланы жууаплы толтуралсакъ, юйюрюбюзню, халкъыбызны да ёхтеми болаллыкъбыз, - деп, жетишимге итиниуюн билдиреди ушакъ нёгерим.

- Этезланы Джаннетни бизни гимназияда барысы да таныйдыла. Ол кесин абаданлагъа бла гитче сабийлеге да бирча сюйдюралгъанды. Кёп кере  дерсден солуу кезиуде, тёгерегине гитче сабийлени жыйып, къучакълап, ушакъ эте  туруучусуна шагъатма. Иги окъугъан сабийле кёп тюрлю къылыкълы боладыла. Бирлери кеслерин тенглерини араларында окъуна кётюредиле, бирлери уа, башхалагъа жууушмай, кеслери алларына. Джаннетча, огъурлу, кесинден башхаланы да сюе билген, жан аурутхан,  жумушубузну да жерге салмай жалчытхан, ариу къылыкълы, намыслы окъуучубуз болгъанына биз бек къууанабыз. Жашауунда салгъан умутларына жетерине ийнанабыз. Сабий не иги окъуса да, аман къылыкълы болса, устазланы кёзлерине илинмейди. Джаннет а, сабий эсе да, уллу адамлыкъ шартланы иесиди. Ол аны ичиндеги ёз кючю бла юйюрюнде алгъан ариу къылыкъланы хайырынданды. Жыл сайын хар къатышхан эришиуюнден олимпиадаларындан да жаланда махтаулу жерле алгъан  алчыбыз Этезланы Джаннетни  жоллары ачыкъ болсунла, - деп алгъышлайды аны  гимназияны таматасыны орунбасары Светлана Владимировна Кадникова да.