Жаш тёлюню кюнюню байрамы къыйматлы халда озгъанды

КъМР-ни Башчысы Казбек Коков республикада Жаш тёлюню кюнюн белгилеу жыйылыулагъа къошулгъанды. Эсигизге салайыкъ, быйыл Къабарты-Малкъарда байрам жангы халда озады – Росмолодёжьну къарауунда эмда «Россейни, шахарланы, адамланы, онгланы бирикдиребиз» деген чакъырыу бла. Эмда ол керти да биригиулюкню къууанчы болгъанды.

Нальчикде Жаш тёлюню кюнюне жораланып бир ненча майдан бирге ишлегендиле, алада патриот программала, интеллектуал эм спорт оюнла, кёрмючле, презентацияла, орамда бардырылгъан жаш тёлю маданиятны эм спортну фестивалы къуралгъандыла.

КъМР-ни Жаш тёлюню ишлери жаны бла министерствосу бардыргъан къырал жаш тёлю политика жаны бла республиканы районларыны бла шахар округларыны ишлерине къарауну эсеплери чыгъарылгъандыла. Биринчи жер Черек районнга жетгенди, экинчи – Урвань районнга, ючюнчю – Май районнга. Муниципалитетлени къауумлары кеслерини жаш тёлю бла байламлы жыйылыуларын бардырыргъа эки, бир бла жарым эмда бир миллион сом ёлчемде ырысхы себеплик алгъандыла.

Республика къатышхан эки федерал эришиуню – «Жаш адамлагъа регион» эм «Огъурлу ишлени региону» – эсеплери белгили болгъандыла. Биринчиге кёре Къабарты-Малкъаргъа регион жаш тёлю политиканы андан ары айнытырча 120 миллион сом субсидия къабыл кёрюлгенди. Ол а аскер-патриот юйретиу арасы болгъан «Эльбрус» жаш тёлю стационар лагерьни боллугъуну белгисиди. 

«Огъурлу ишлени региону» программагъа кёре республика 8 миллион сом аллыкъды, ырысхы волонтёрлукъгъа бла добровольчествогъа себепликге къоратыллыкъды.

Байрам концертде Жигитлерибизге – энчи аскер операциягъа къошулгъанлагъа эм аланы юйюрлерине болушлукъгъа деп къуралгъан жандауурлукъ марафонну эсеплери да чыгъарылгъандыла, аны министерство Россейни кюнюнде – 12 июньда - башлагъан эди.