Учуз ипотекалада тюрлениуле

Ипотека программалада боллукъ тюрлениулени юсюнден объясняем.рф порталда ангылатхандыла.

Сёз мында льготалы программаланы юсюнден барады. Аланы болжалы чыкъгъанлыкъгъа окъуна, ары дери алгъанлагъа бир зат да тюрленирик тюйюлдю: тёлеулери, процентлери, излемлери, къайтарыр заманы алайлай къаллыкъды.

Эсигизге салайыкъ: 8 процент бла берилген учуз ипотеканы болжалы быйыл 1 июльда чыгъады. Алай бир-бир банкла аны бериуню ары дери окъуна тыйгъандыла. РФ-ни Финансла министерствосунда айтханларына кёре, программа кесини борчун толтургъанды дерчады – ол пандемияны къыйын заманында къурулуш бёлюмге, адамлагъа да себеплик этгенди.

ИТ-ипотека уа 2024 жылны ахырына дери ишлерикди. Бир талай банк а аны юсю бла кредитни шёндюден окъуна бермей тохтагъандыла. Сылтаулары – къырал анга деп бёлген ахчаны мардасы чыкъгъанды. Правительство уа энди бу программаны андан ары бардырыр амалланы излейди.

Юйюр ипотека бла уа къалай боллукъду?

Аны ставкасы 6 процентди, ол кеси да 2030 жылгъа дери бардырыллыкъды.

Быйыл 1 июльдан сора бу льгота программаны эм азындан эки сабийлери болгъан ата-анала хайырланыргъа боллукъдула. Излем – кредитни аллыкъ заманнга сабийледен бири окъуна акъылбалыкъ болмазгъа керекди.

Бу программаны юсю бла фатарны неда юйню гитче шахарлада неда жашау журтла аз ишленнген регионлада алыргъа жарайды. Субъектледе болумну юсюнден наш.дом.рф сайтха кирип билирге боллукъду. Адам кеси ишлерге сюе эсе уа юй, бу ипотеканы регионланы барында да берликдиле.