Ана жюрек

Халиматны баш иеси эртте ёлюп, тёрт сабийни анга кесинлей ёсдюрюрге тюшгенди. Болушлукъ этген хазна адам болмагъанды. Къалай-алай болса да, юч жашына бла къызына бийик билим алдырып, юйюрлюле да этгенди таулу ана. Бюгюнлюкде аланы хар бири да бирен жерде ишлей, баш кечиндиредиле. Ынна да туудукъларына къууана жашайды.

Ана, таулулада тёредеча, гитче жашы бла жашайды. Мажир аскерчиди. Иши бла байламлы юйюрю бла бир къауум жылны Ростовда туруп, туугъан элине быйыл жыйышханды. Юйдегиси Раузат бла эки сабий ёсдюредиле. Андан къайтханлы келин къайын ана бла жашайды. Аралары да бек игиди.

Мажирден сора Халиматны бир къызы бла эки жашы барды. Барысы да бир бирге билеклик эте жашайдыла. Ол а таулу ана аланы тюз юйретгенини юсюнден айтады.

…Сегизинчи мартда Халиматны туугъан кюнюдю. Миллетибизни къадарында ол къара кюн болгъаны себепли, таулу тиширыу бир заманда аны байрамча белгилемегенди. Алай бир кюн алгъа, сабийлери аны жюрегин къууандырмай къоймаучудула. Къызыны келирин сакълап, ана терезе аллында олтуруп эди. Гюллени неден да бек сюйген тиширыугъа андан уллу саугъа болмаз жер башында. Жашыракъ заманында аны кеси арбазы да аладан толу болуучу эдиле.

Кюн тюшледе ол, терезеден къарап, Мажирни келип тохтагъанын эследи. Андан жаш машинадан уллу гюл къысымны тюшюрдю. Халимат сабийча къууанды, аланы кёрюп. Алай Мажир гюлле бла, юйню кеслери жашагъан эшиги таба атланды. Ол кезиуде аны жюрегин бир сейир мудахлыкъ къысды… Къысым, анга угъай, Раузатха эди. 8 мартны байрамына... Бир къауум заманны ана шош, тебалмай турду. Жашы бла келини татлы жашагъанлары аны бек къууандыра эди. Бу жол да ол гюллени аз да къызгъанмады келининден. Алай жашы аны сансыз этип, жангыз бир гюлчюк бла атын тапмагъаны аны жюрегин жер бла тенг этди…

Халимат бир кесек эс жыйыгъанда, Мажир ашыгъышлы къабакъла таба атланып, машинасына минип, артха ишине тебирегенин кёрдю. Ана къызы келирин ашыгъып сакълай эди. Къарангы бет ала, Асият да келди сабийлери бла анасын алгъышларгъа. Келин кеси этген тортун да холодильникден чыгъарып, барысы да чай ичдиле. Сора сабийле да, Раузат да болмагъан кезиуде Асият ананы кёлю мудах болгъанын эслеп, не болгъанды, деп сорду. Халимат сёз да айталмай, жиляп къалды. Мажир алай этерикди деп сакъламагъан анасын: «Сени гюллеринги энди келтирликди», - деп жапсарыргъа кюрешди. Болсада къарындашы аналарын сансызлап къойгъаны уа аны кесини жюрегин да тарс деп чачылыргъа жетдиргенди...

Мажир да ишден кечирек келди. Ол машинасын арбазгъа салгъан кезиуде, Халимат терк-терк терезе къатына жууукълашды. Алай…