«МИР» карта къайсы къыраллада ишлейди?

Россейде чыгъарылгъан Visa эм Mastarcard банк карточкала тыш къыраллада ишлемей тохтагъанлы эки жылдан артыкъ болады. Ол кеси да чеклениуле кийирилгени бла байламлыды. Энди ала жаланда бизде ишлейдиле. Тышына атланнган туристле уа МИР карталаны хайырланып башлагъан эдиле. Алай энди башха къыралла аны да алмай тебирегендиле. Игиси – бардыла энтта да бирлери аны бырнак этмеген. Ала уа къайсыларыдыла?

МИР картаны бир тюрлю чексиз Белоруссияда, Абхазияда эмда Къыбыла Осетияда хайырланыргъа боллукъду. Ол айтхан неди десегиз, тюкенледе аны бла тёлерге, банкоматлада ахча тешерге… Башха къыраллада уа тюрлю-тюрлю чеклениуле бардыла.

Армения

Анда МИР карта бла жаланда «ВТБ Армения» банк ишлейди. Ахчаны аны банкоматларында тешерге боллукъду.

Къазахстан

Мында да ВТБ банкны банкоматларында тешерге жарайды ахчаны. Тюкенде неда башха жерде карточка бла тёлерге онг жокъду.

Таджикистан

Карточкадан ахча тешерге сюе эсегиз Dushanbe City банкны офислерине барыгъыз. Алай болум терк тюрлене барады, шарт информация азды.

Куба

Ол узакъ къыралны жер-жерлеринде МИР деген жазыу бла банкоматла бардыла - ахчаны ма алада тешерге боллукъду. Дагъыда бир-бир ашханалада бла тюкенледе да бу карточка бла тёлерге къоядыла.

Венесуэла

МИР картаны аны эм уллу Banco de Venezuela банкы алады. Аны бла дагъыда туристле аслам болуучу жерледе тёлерге жарайды.

Вьетнам

Анда уа бу картадан ахчаны ВРБ-ны (Вьетнам-Россей бирлешиу банк) банкоматларында тешерге боллукъду. Дагъыда аллай банкоматла болгъан жерледе тёлерге.

Айтханыбызча, болум терк тюрлене барады. Бюгюн МИР картаны бир жерде ала эселе, тамбла анда чек салыргъа неда аны тыйгъан жерде жангыдан алып башларгъа боллукъдула. Аны ючюн тыш къыралгъа тебирерден алгъа информацияны туроператордан неда банкны кесинден соругъуз.