ЖКХ ючюн артыгъы бла тёлеген эсегиз…

Бирде коммунал жумушла ючюн келген тёлеу къагъытда биз сакълагъан угъай, башха затла жазылып боладыла. Сёз ючюн, токну, газны, сууну багъалары уллуракъ болуп. Тёлегенден сора, ала терс тергелгенлерин билсегиз, артыкъ бергенигизни ызына къайтарыргъа боллукъсуз. Аны этерча, управляющий компаниягъа неда МФЦ-гъа, бирде уа сюдге окъуна барыргъа тюшерикди.

Жангыдан къайсы жумушланы багъасын жарайды тергерге

Ары ма была киредиле: электрокюч, жылыу, суу, газ, канализация, кир-кипчикни ташыу.

Тёлеу кёп неда аз жанына тюрленирге боллукъду. Артыкъ берилгенни ахча бла къайтарлыкъ тюйюлдюле, артда тёлеулеригизден кетерликдиле. Терс тергелип, сиз берлик къалгъан эсе уа, аны энди келлик квитанциягъа къошарыкъдыла.

Артыкъ тёлеу къачан болады?

Мында талай сылтау болуучуду:

- Жашау журт-коммунал жумушла бла жалчытыу бир кесек заманнга тыйылгъанда. Сёз ючюн, ремонт бардырылгъан кезиуде суу неда ток келмей турсала. Аллай шартланы управляющий компанияла неда ТСЖ-ла эсепге кеслери алыргъа борчлудула. Хайырланыучула уа аны ючюн тёлерге керек тюйюлдюле.

Хар ресурсну тыяргъа жараулу заман мардасы барды: газны бир айгъа тёрт сагъатдан, жылыуну уа 24 сагъатдан кёпге тохтатыргъа жарамайды.

- Быллай жумушланы осал качествосу. Алагъа Правительствону бегими, СанПиН эмда келишимле бла излемле бардыла. Сёз ючюн, сууну иссилиги 60 градусдан аз эмда 75 градусдан кёп болмазгъа керекди. Ол 40 градусха жетмей эсе уа, аны ючюн тюз сууукъ суугъача алай тёлерге боллукъду. Сууну температурасын управляющий компанияны неда ТСЖ-ны келечиси ёнчелерге керекди.

- Фатарда адам жашамай эсе. Адам анда беш кюнден кёп турмагъан эсе, ЖКХ жумушланы багъасын жангыдан тергерге эркинлиги боллукъду. Шагъатха андан къагъыт излерикдиле: командировкада болгъанына, поездге неда самолётха билетле, санаторийде солугъанына…

- Бузулгъан счётчикле. Алай болса, жангыдан тергеуню хайырланыучула кеслери неда жумушла бла жалчытхан организацияла излерге боллукъдула.

- Фатарда жашагъанланы саны азайгъанда. Анга да шагъатха тийишли документле кёргюзтюрге керек боллукъду.

- Счётчикле жокъ эселе. Сёз ючюн, кёп фатарлы юйде (анда саулай) жылыуну тергеген бир прибор бар эсе, аны ючюн тёлеуню озгъан жылны орта айлыкъ къоранчларына неда уа нормативлеге кёре чыгъарлыкъдыла. Ызы бла уа, харжыллыкъ тюзетиуледен сора, жангыдан тергерге боллукъдула.

- Жашау журт-коммунал жумушха льгота берилген эсе. Инсан пенсиягъа чыкъгъанда неда сакъатлыкъ эсепге тюшгенде, анга тюрлю-тюрлю онгла бериледиле. Алагъа кёре быллай жумушланы багъаларын да жангыдан тергейдиле.