Республикада солугъанланы саны ёсгенди

Къабарты-Малкъарны Курортла эм туризм министерствосундан билдиргенлерине кёре, 28 апрельден башлап 12 майгъа дери республикада 60 минг адам солугъандыла, ол а, былтырны бу заманыны эсеплери бла тенглешдиргенде, 20 процентге асламды.

Кюнню халы артыкъ иги болмаса да, туристлени майда солууларын бузмагъанды. Кюн сайын Жылы-Суугъа бла Нарзанла таласына жолоучулукълагъа мингден аслам адам келип тургъандыла. Кёп турист, хар замандача, Минги тауда болгъанды. Бир-бир кюнледе гондол канат жол бла башына 5 мингнге жууукъ турист миннгендиле. Талайы жаяу жолоучулукъланы сайлагъандыла, башхалары уа тау-лыжа жоллада бла жангы къар паркда учхандыла. Саулукъларын Нальчикни санаторийлеринде тюзетирге келгенле уа байрам программалагъа да баргъандыла.

  Чегем бла Черек районлагъа уа туристле кёпкюнлюк солуугъа келгендиле, анга себепликни алада «Туризм эм къонакъбайлыкъны индустриясы» проектни чегинде алгъаракълада къонакъ юйле ишленнгенлери этеди.