Низамгъа гитчеликден юйрене

Къарчаланы Ислам 2014 жылны 18 ноябринде туугъанды. Бюгюнлюкде ол Нальчикни 12-чи мектебини ючюнчю классыны окъуучусуду, карате бла эки жылны тренер Будайланы Казбекде кюрешеди. Спортха уа аны анасы Къарчаланы Сакинат келтиргенди. «Казбек къоншумду, кеси да жетишимли каратечиди. Ол, тренер болуп, юйренирге сюйген сабийлени жыйгъанын билгенимде, мен да жашымы келтиргенме. Ислам жарауну ал кезиуледен окъуна жаратханды, залгъа жюрюрге сюйгенин билдиргенди. Жарым жыл жарау этгенлеринден сора, акъ бел баугъа мардаланы бергенди, артда эришиулеге да къатышып тебирегенди», - дейди.

Ислам алыкъа эки эришиуде болгъанды. Биринчиси каратени зендокай будо эм киокушин тюрлюлеринден Къалабекланы Исмайылны хурметине аталгъан турнир эди, анда 30 килограммгъа дери ауурлукъда доммакъ майдалны къытханды. Бу кюнледе уа Къарачай-Черкесде эришиуден «алтын»  бла къайтханды. Анда Ислам тёрт сермеш бардыргъанды, аладан экисинде нокаут бла хорлагъанды.

Жараулагъа Ислам ыйыкъгъа юч-тёрт кере барады, жууаплыды, спорт бла кюреше, окъууда да артха къалмайды. Бош заманында уа, кёп жашчыкълача, лего жыяргъа сюеди.