УФСБ: жалгъан документлени кёргюзтюп казна ахчаны къымгъанды

Экономикада аманлыкълагъа къажау излеу-тинтиу жумушланы толтургъан кезиуде РФ-ни ФСБ-сыны КъМР-де Управлениясыны къуллукъчулары, республиканы полициячылары бла бирге, «Диск Строй» ООО-ну башчысы А.Хадуговну бузукъчу ишин тыйгъандыла.  Кюч ведомствону пресс-службасындан бизге билдиргенлерича, ол тёлеуле этгенде  законланы бузгъанды. 

Тохташдырылгъаныча, ол Казначействону КъМР-де Управлениясына ахча ётдюргенини юсюнден жалгъан документлени кёргюзтгенди. Аны хатасындан казнагъа 26 миллион сом къоранч этилгенди.

Нальчикни шахар сюдю А.Хадугов РФ-ни УК-сыны 187-чи статьясыны 1-чи кесегине бузукълукъ этгенин тохташдырып,  аны эркинлигин 1 жылгъа бла 6 айгъа сыйырыргъа деген оноу чыгъаргъанды. Ол условно халда толтуруллукъду. Оноу кючюне киргенди.  Этилген къоранч толусунлай къайтарылгъанды.