Даражалы эришиуде – ючюнчю жер

Магаданны «Колымский» спорт арасында, Олимпиаданы чемпиону Валерий Попенченкону хурметине аталып, боксдан тёрели 53-чю эришиу ётдюрюлгенди. Быйыл аны баш саугъасы – агъач ладья – ючюн къыралны отуз регионундан эм кючлю спортчула сермешгендиле, ол санда Элбрус районну олимпиада резервли спорт школундан Гыжгыланы Юсюп да.

Юсюп, 71 килограммгъа дери ауурлукъда эрише, доммакъ майдалны къытханды. Ол алчы жерге да чыгъаргъа боллукъ эди, алай, тренери Гергъокъланы Ахмат билдиргенича, судьяланы терс оноулары чырмагъанды. Бусагъатда боксчу СКФО-ну биринчилигине хазырлана турады, ол а бу айны ортасында Грозныйде боллукъду.