Сакълыкъны жорукъларыны юсюден энтта бир кере

Право низамны сакълаучулагъа телефон бла хыйлачылагъа кеслерин алдатхан инсанладан тарыгъыула кюн сайын келедиле. РФ-ни СК-сыны КъМР-де следствие управлениясындан бизге билдиргенлерича, телефон бла хыйлачылыкъ  этгенле усталыкъларын ёсдюргенлей, жангы амалланы хайырланнганлай турадыла. Аманлыкъчылыкъларына жетишир ючюн ала информация технологияланы, жангы программаланы хайырланадыла, къырал органланы, банкланы шартларын жазып,   жалгъан документлени хазырлайдыла.

 Аны бла байламлы следствие управленияны къуллукъчулары газетни окъуучуларына сакълыкъны жорукъларын энтта бир кере эсгертедиле. Асламында  хыйлачыла бир ненча мадарны хайырланадыла. Сёзге, ала телефон номерни алышыргъа онг берген системаны болушлугъу бла сёлешедиле.  Бу кезиуде уа сизге бир бири ызындан башха-башха номерледен бир ненча звонок келеди.

- Бу кезиуде телефонугъузда жалгъан номерни кёресиз. Аны энчи программаны болушлугъу бла этедиле. Ол къалай ишлейди дегенде, хыйлачы сизге сёлешген кезиуде, кесини номерини орунуна къайсы болса да бир тарихлени жазып къояллыкъды,-деп ангылатхандыла  следствие  управлениядан.

Алай болса,  жууап бермей, къырал органнга, банкга сайтлада белгиленнген номерлерине сёлешип, ишни болумун билирге керекди.

 Дагъыда бузукъчула, тюрлю-тюрлю сылтаула айтып, ахчаны башха счётха ашырыгъыз, деп къаты боладыла. 

- Следствие комитетни, право низамны сакълаучу башха органланы къуллукъчулары инсанны ведомствогъа тохташдырылгъан низамгъа кёре чакъырадыла. Алагъа къагъытда жазылып, повестка ашырылады. Телефон бла адамны кесини, банк картасыны юслеринден шартла бир заманда да суралмайдыла,-деп ангылатхандыла бизге.

 Дагъыда право низамны сакълаучу органланы келечилери ахчаны  башха жерге ашырылырын бир заманда да излемегенлерин билирге керекди. Ол законсузду. Аманлыкъчыны тутаргъа болушур ючюн, ахчаны башха жерге ашырыргъа керекди, неда   ахчаны сакълар ючюн, «къоркъуусуз счётха» салыргъа тийишлиди, деген тилекле хыйлачылыкъ  бла байламлыдыла. Сизге алай сёлешселе, тийишли органлагъа билдирирге керекди.

Ахчагъызны урларгъа сюйгенле   электрон амал бла жалгъан документлени ашырып,   кеслери къурагъан шартланы кертиликлерине ийнандырыргъа кюрешедиле. Башхача айтханда, хыйлачы следовательме, неда башха къырал органланы къуллукъчусума деп алдайды. Ийнандырыр мурат бла уа жалгъан документлени ашырады. Ызы бла уа тюрлю-тюрлю сылтаула къурап, ахчагъызны урларгъа умут этеди.

 Быллай кезиуге тюшген эсегиз, къырал органланы официальный сайтларында басмаланнган  номерлеге сёлешип, битеу шартланы сураргъа керекди. Алай аманлыкъчыгъа бу муратыгъызны юсюнден билдирсегиз, къоркъутуп, ётюрюкле къурап, сёлешдирмезге кюреширикди.  Сёзге, шартла къырал жашырынлыкъны тутадыла, башхалагъа билдирсенг,  жууапха тартыллыкъса, деп. Бузукъчу алай бла сизни тыяргъа кюрешеди.

- Республиканы хурметли жамауаты, телефон бла сёлешген белгисиз адамланы айтханларына, тилеклерине, къоркъутханларына ийнанмагъыз. Не сылтау да къурап, ахчаны ашырыгъыз деп билдирген счётха жукъ да салмагъыз. Сёлешгенлени юслеринден а полициягъа, башха органлагъа белгили этигиз, дегендиле следствие управлениядан.

Сизни алдаргъа кюрешген адам право низамны сакълаучу органны келечисиме десе, ол айтхан ведомствону «къызыу ызны» телефонуна сёлешип, аны тинтирге боллукъду. Сёзге, Следствие комитетни следователиме деген кезиуде  РФ-ни СК-сыны ышаныулукъ номерине: 8 (800) 100-12-60, неда ведомствону КъМР-де Управлениясына 8 (8662) 77-64-22 сёлеширге керекди.