Терек бахчаладан биринде - сауутла, окъла да

Быйыл 11 апрельде эрттенликде 4 сагъатда Рос-сейни ФСБ-сыны КъМР-де Управлениясыны къуллукъчулары экстремизм эм терроризм бла байламлы аманлыкълагъа къажау излеу-тинтиу жумушланы толтургъан кезиуде Нальчикни тийресинде терек бахчачыланы биригиулеринден биринде къолларында сауутлары бла эки адамны ачыкълагъандыла. Право низамны сакълаучулары аланы бойсунургъа чакъыргъанларында, бузукъчула сауутладан атдырып башлагъандыла. Алагъа къажау от ачып, право низамны сакълаучула ишеклилени жокъ этгендиле.

РФ-ни СК-сыны КъМР-де следствие управлениясы бу иш бла байламлы Россейни УК-сыны 222-чи статьясыны 2-чи кесегине (къауум адам сауутланы законсуз сатып а лгъанлары, асырагъанлары эм жюрютгенлери ючюн), 222.1-чи статьясыны 2-чи кесегине (къауум адам, алгъадан келишип, чачдырыучу затланы законсуз сатып алгъанлары, асырагъанлары, жюрютгенлери, сатханлары ючюн) эмда 317-чи статьясына (право низамны сакълаучу органланы къуллукъчуларына чабыууллукъ ючюн) кёре терслеу материалла ачханды.

Управленияны следовательлери бла криминалистлери атышыу баргъан жерни тинтген кезиуде сауутла, алагъа окъла, гранатала тапхандыла, деп билдиргендиле бизге ведомстводан.
ТИКАЛАНЫ Фатима хазырлагъанды.