Ол бизге къайсы жаны бла да юлгю эди

Усталыкъланы араларында устаз бек жууаплыланы бирине саналады. Ол да бошдан тюйюлдю. Сабийни окъургъа, жазаргъа юйретиу бла къалмай, аны халин, къылыгъын, сезимин адамлыкъ даражагъа жетдирген бек ауур ишди.  Артыкъда бу къыйын заманда. Аны бет жарыкълы тамамлар ючюн, фахму, уллу тёзюмлюк, адамлыкъ да керекдиле.

Аллахха шукур, аллайларыбыз аз тюйюлдюле. Хочуланы Магометни къызы Лейля аладан эди. Ол уруш жылладан сора киришген эди бийик билим алыргъа. Кеси да къыйын факультетни сайлагъан эди – химияны. Артда да, алгъан билимим жетеди деп къалмай, аны  ёсдюргенлей тургъанды.

Бир талай школда уруннганды.  Жашауун Аппайланы Мухтар бла байламлы этгенден сора уа кёп жылланы Тёбен Чегемде устазлыкъ этгенди. Ишин бет жарыкълы,намысы-сыйы бла тамамлагъанды.

Бу элде ол окъутмагъан хазна адам болмаз.  Лейля Магомедовна, дерсле бергенден сора да, завучлукъ, директорлукъ да этип тургъанды. Кеси иш кёллю болгъаны, билимге тартылгъаны себепли окъуучуларындан да аны бек излегенди. «Халкъгъа билим бериуню айырмасы» деген атха да андан тийишли болгъан эди.  «Биз бюгюн сохталарыбызны къалай юйретсек, тамблагъы жашауубуз анга кёре боллукъду»,-дерге ёч болуучу эди. Ол жоругъун унутмай, ишин алай бийик даражада бардырып тургъанды.

Лейля Магомедовна къуруда жангылыкъла излеп,табып, бир дерси башхасына ушамазча алай сейирлик къурагъанды окъуу сагъатларын. Урокларында не заманда да сюйюп, кёлленип, шош болуп олтургъаныбыз эсимдеди. Бизни окъургъа, ишлерге кёллендире  билгенди ол. Ариу къылыкълы, тизгинли, адепли болурубузгъа да бек къайгъыргъанды.

Химия кабинетни да ол кеси алай тап жарашдыргъан эди. Анда окъуучулагъа керекли хар  зат бар эди - таблицаладан башлап айтхылыкъ алимлени суратларына дери да. Бу предметни бизге алай иги ангылата эди, кёплерибиз, школ, район, республикалы эришиулеге тири къатышып, алчы жерлени алыучу эдик.   

Школ жылларым эсиме тюшселе, Лейля Магомедовнаны сабыр, оюмлу сёлешгени, дерсни хар такъыйкъасын къыйматлы ашыргъаны, окъуучуланы къолларын кётюрюп, аны ыразы этерге кюрешгенлери кёз аллыма келип къаладыла. Ол хар сабийни багъалагъанды, ёз баласынача къарагъанды, хар бирибизге энчи эс бурургъа заман, кюч-къарыу да къайдан табалгъан болур эди деп келеди акъылыма. Анга хурметибиз асыры уллудан, дерслерине хазырланмай келирге уялгъан этиучю эдик. Аны къуру биз угъай,  ата-анала, эллиле да бек сюйгендиле.

Сынамлы устаз биргесине ишлегенлеге да сакъ  болгъанды. Бу огъурлу адамны юсюнден озгъан заман бла айтхан къалай къыйынды. Лейля Магомедовна кёп болмай ауушханды. Анга Тёбен Чегемни жамауаты саулай да бушуу этгенди. Хар келген аны жаланда игилик, ариулукъ бла сагъына эди, жюрек ыразылыгъын айта эди. Барыбызны да анга хурметибиз уллу эди, бек уллу. Жаннетли болсун!

Лейля Магомедовна баш иеси Аппайланы Мухтар бла аламат сабийле ёсдюргенди - бир жаш бла эки къыз. Ала къайда болсала да, аналарыны бла аталарыны намысларын тюшюрмезликлерине толу ийнаныпма.

 

Шауаланы Разият.
Поделиться: