Кадастр ишлени тамамлауда шёндюгю амалланы сингдириуге эс бурмай жарамаз

Къабарты-Малкъар къырал аграр университетни агрономия факультетинде бу кюнледе АБУКО ассоциацияны жер эм ырысхы бла байламлы халла сферада регионла аралы илму-практика конференциясы бардырылгъанды. Аны ишине Юг эмда Шимал-Кавказ федерал округланы келечилери къатышхандыла, деп билдиргендиле вуздан.

Жыйылыуну ачхан кезиуде ал сёзлери бла КъМР-ни экономиканы айнытыу министри Рахайланы Борис эм «Жеринден тепдирилмеген мюлкню кадастр багъасын тергеу» деген къырал бюджет учрежденияны таматасы Рамазан Бауаев селешгендиле. Конференцияны ишин АБУКО-ну башчысы Василь Мазитов бардыргъанды.

Тюбешиуде бизни къыралда экономиканы «цифрагъа» кёчюрюу амалланы, ол жер эм ырысхы бла байламлы халла сфераны къалай тюрлендирирге боллугъун сюзгендиле. Субъектлени комплекс халда тамамланнган кадастр ишлени бардырыу жаны бла излемлерини, геоинформация системаланы сингдириуню эмда бийик квалификациялы кадрланы хазырлауну юсюнден да сёлешгендиле.