Усталыкъларын ёсдюрюуню къайгъысын кёрюп

Къабарты-Малкъарны къырал аграр университети кесини «Агрокадрла - 2030» деген магъаналы проектин жетишимли бардырады. Вуздан билдиргенлерича, быйыл «Приоритет-2030» программаны чеклеринде 330 чакълы специалист анда усталыкъларын кючлендиргендиле. Ала барысы да агропромышленность бёлюмде уруннган адамладыла.

Университетни проекти ол къырал программагъа киреди. Аны тамамлар умутда быйыл вузда проект офис къурагъан эдиле. Анда уа тышындан келген специалистлеге къошакъ билим бередиле. Аланы санында педагогла, АПК-да ишчиле, дагъыда студентле бла аспирантла да бардыла. Алагъа быллай курсла къурагъандыла:

- «Обзор статья: къурамы эмда структурасы (академическое письмо)»;

- АПК-ны «Эл мюлк 4.0» амалгъа кёчюргенде специалистлени юйретиу;

- Органика эл мюлк эмда битимчилик продукцияны чыгъарыу система;

- Эл тийрелени комплекс халда айнытыу;

- Информацияны тинтгенде цифралы технологияла.

«Приоритет 2030» программа бизни къыралда университетлеге себеплик этерге деп къуралгъанды. Аны хайырындан 2030 жылгъа Россейни илму-технологияла эмда социал-экономика жаны бла айнытырыкъ жюзден артыкъ билим бериу учреждение болургъа керекди.