Иги кесек соруугъа къаралгъанды

Къабарты-Малкъарны Регионнга оноу этиу арасы (ЦУР) бир ыйыкъны ичинде  беш жюзден аслам соруугъа къарагъанды. Аланы асламысы «Telegram», «Однаклассники, «ВКонтакте» социал сетьледе кётюрюлген «Инцидент-менеджмент» системаны амалы бла жарашдырылгъан проблемаладыла.  

Сагъынылгъан сорууланы кёбюсю, хар замандача, социал къоруулау, жашау журт-коммунал мюлк, тийрени игилендириу, жолланы тапландырыу, саулукъ сакълау эм башха соруула бла байламлыдыла. Аланы хар бирине  специалистле тынгылы къарап, профильлерине кёре тийишли ведомстволагъа билдиредиле.

Бу жол тарыгъыуланы асламысы Нальчик шахар округда, Элбрус бла Бахсан районлада жашагъанладан келгенди.  Алгъа заманда жууап берилирча бир сагъат сакъларгъа тюшгени кёплеге тап болмагъанды. Энди уа, орта эсеп бла алып айтханда, отуз жети минутдан кёпге созулмагъаны ишни бютюн жетишимли бардырыргъа онг тапдырады.  

Алай бла,  жети  кюнню ичинде специалистле жууаплы ведомствола бла бирге Тырныауузда Мичурин эм   Бахсанда Угнич орамлада арбазла таза суу бла жалчытылынырча мадар этгендиле.  Акъ-Сууда Жабо улу орам кече жарыкъ болурча жумуш да  тамамланнганды.   Тырныауузда Элбрус эм  Терекде  Ленин атлы орамлада  юйлеге жылыу барырча этилгенди.  Андан сора да, сагъынылгъан кезиуде Куркужинде  62-метрлик  жаяу жюрюгенле хайырланнган кёпюрге къаралгъанды.

Эсге сала айтсакъ, Регионнга оноу этиу ара офис халда ишлемейди, «Инцидент-менеджмент» бир тюрлю соруугъа  эс бурурча, ол социал сетьлени биринде жазылыргъа керекди. Ол санда проблема тынгылылыракъ ачыкъланса игиди.