Алтын къазып башларыкъдыла

Тырныауузда вольфрам-молибден къазгъан комбинатны графикде белгиленнгенден кечирек башларгъа тюшерикди. Ол  аны жангыртыу ишле  бла байламлыды.  Жууукъ заманда мында  алтын къазгъан карьер да ачыллыкъды.

- Тырныауузда «Ростех» къырал корпорация  бардыргъан къыйматлы  проектге  уллу ышаныулугъубуз барды. Аны ачылыуу  созулургъа тюшгенди, болсада ол   инфраструктураны жангыртыу бла байламлы чырмауладыла. Бюгюнлюкде «Ростех» аны бла тири кюрешеди, - дегенди РФ-ни Экономикасын айнытыу министрни орунбасары Сергей Назаров ТАСС-ны пресс-конференциясында.

Ол айтханнга кёре, тийишли ишле «Эльбрусметалл» биригиу алтын къазаргъа эркинлик алгъанындан сора башланнгандыла. Аны  себепли башламчылыкъ  экономика жаны бла къыйматлы болурча анга тюрлениуле кийирирге тюшгенди.

Анга кёре, комбинатда вольфрам бла  молибденден   тышында, алтынны да жарашдырлыкъдыла. Жангы проектге жыл жарым кетерикди. Болсада ол жашауда бардырыллыгъына сёз жокъду. 

Алгъадан белгиленнгенича,  магъадан Тырныауузда къазыллыкъды эм жарашдырыллыкъды, аны концентратлары уа Невинномысск  шахарда заводха ашырыллыкъдыла.

Саулай алып айтханда,  проектге  55 миллиард  сом чакълы  къоратыллыкъды. Предприятияланы экисинде да тогъуз жюзден аслам адам урунургъа онг табарыкъдыла. 

Эсге сала айтсакъ, производствону быйылны ахырына, келир жылны алларында башлар  мурат болгъанды.