Битеу мекямла эсепдедиле

Жангы жылны аллында РФ-ни МЧС-ини КъМР-де Баш управлениясыны къуллукъчулары тёрели тинтиу ишлени башлагъандыла. Къоркъуусузлукъну жалчытханла бу жол Музыка театрны байрам кюнледе от тюшюуден сакъланыу жаны бла хазырлыгъын ачыкълау жумушланы бардыргъандыла. Белгилисича, бу маданият мекямда Жангы жылгъа жораланнган сабий байрамла ётерикдиле.

Байрамгъа адам аслам  келгенин эсге ала, объектде ишлегенлени хар бири да от тюшген кезиуде къоркъуусузлукъну жорукъларын толтура, отну ёчюлтюучю кереклени да хайырлана билирге керекдиле.

Ведомствону специалистлери театрны хар отоуун, хар эшикни болумларын, адамлагъа билдириу системаны къалай ишлегенин тинтгендиле.  Дагъыда къутхарыучула жууаплы адамла бла юйрениуле бардыргъандыла эм объектде бир тюрлю къыйын болум болса, битеу жууаплылыкъ аны таматасыны боюнуна салынырыгъын эсгертгендиле.  Байрам оюнланы кезиуюнде сахнада дежурныйле ишлерге керекдиле.

Бюгюнлюкде республикада эсепде быллай 305 объект барды. Пиротехника сатаргъа эркинлик алтысына берилгенди.  Бюгюнлюкде от ёчюлтюучюле 176  объектде болгъандыла. Консультацияла бла адамланы мекямдан чыгъарыу жаны бла жараула  ётгендиле.

Регионда белгиленнген байрамла барысы да РФ-ни МЧС-ини КъМР-де Баш управлениясыны энчи контролюндадыла, деп билдиреди ведомствону пресс-службасы.