Зауукълу концерт, саугъала, тюбешиуле да

    Жангы жылгъы байрам адамланы бирге жыяды, ол себепден аны тамата, сабий да сюйюп сакълайдыла.  Аны бла байламлы жылны ахырында кёп тюрлю къууанчлы иш болады. Бу жол да Нальчикни солуу эм культура паркыны тепсеу залында «Ветеран» клуб абадан адамлагъа Жангы жылгъа зауукълу ингир къурагъанды. Аланы Урушну, урунууну, Сауутланнган кючлени эмда право сакълаучу органланы ветеранларыны Нальчик шахар организациялары бла Нальчикни администрациясы саугъала бла къууандыргъандыла, белгили артистлени къатышыулары бла концерт да болгъанды.
      Байрамгъа жюз инсан келгендиле. Аланы ветеранланы организацияларыны башчысы Абдуллаланы Мустафа бла администрацияны культура управлениясыны башчысы Нёгерланы Танзиля алгъышлагъандыла. Ала, таматалагъа шахарны, республиканы айныууна салгъан къыйынлары ючюн ыспас эте, саулукъ, насып, узакъ ёмюр тежегендиле. Мустафа Камалович а дагъыда Совет Союзну чемпиону, спортну устасы ауур атлетчи Уяналаны Владимирни 85 жыл толгъаны бла  алгъышлагъанды.  
    Жашууланы Баширни, Марина Шериеваны, Аскер Виндижевни, Марьяна Хупованы, Аслан Мамиевни, Артур Аришевни жырлагъанларына  тынгылай а, къонакъла миллет, терк тепсеулени да тепсегендиле. «Эльбурс» бла  «Лезгинка» ансамбльле уа ариу милет кийимледе дауурбасла бла ариу тепсеуле кёргюзтгендиле.