Экономика

Къабарты-Малкъар къырал аграр университетде ётген ачыкъ лекциягъа республиканы экономиканы айнытыу министрини орунбасары Ольга Белецкая да къатышханды. Ол окъуучулагъа гитче эмда орта предпринимательствогъа къырал болушлукъну юсюнден хапарлагъанды.

Шимал Кавказ федерал округда гитче эмда орта предпринимательствону онгдуруу жаны бла программаны чеклеринде битеу да 7,5 миллиард сом багъасына 200 келишим этилгенди. Ол санда 1,5 миллиард сом бла аланы Кавказ.РФ жалчытханды.

Къабарты-Малкъарда быйылны биринчи жарымында социал-экономика жаны бла шартланы Шимал-Кавказстатда чыгъаргъандыла. Кёрюмдюлени асламысы бёлюмледе айныу болгъанын кёргюзтедиле.

Быйыл Къабарты-Малкъарда 13 кёпюр жангыртыллыкъды, саулай алып айтханда, тийишли ишле  644 метр чакълы бирде бардырыллыкъдыла. Бюгюнлюкде  объектлени барында да  къыстау ишле барадыла. Бир къауумунда   мурдорлары  бла аркъауларын салып кюрешедиле, къалгъанларында да башха жумушланы тамамлайдыла. Жууукъ заманда кёпюрледен бешиси хайырланыргъа берилликди, деп билдириледи КъМР-ни Транспорт эмда жол мюлк министерствосуну пресс-службасындан.

Быйылны биринчи жарымында Россельхозбанк Къабарты-Малкъарда аграр бёлюмде уруннганлагъа 400 миллион сом багъасына себеплик этгенди. Ол санда 170 миллион сом кезиулю сабан ишлени тамамлаугъа жиберилгенди, деп билдиргендиле регионну Эл мюлк министерствосундан.

Быйылны ал кюнлеринде башлап тергегенде, Къабарты-Малкъарда жашагъан инсанла шёндю банклагъа 13,3 процентге аслам ахча салгъандыла. Биринчи июльгъа ол 69 миллиард сом болгъанды. Аны юсюнден Россейни Банкыны бизни регионда бёлюмюнден билдиргендиле.

Бюгюнлюкде Къабарты-Малкъарда  «Россети Северный  Кавказ»  компаниягъа  ток ючюн кёп заманны тёлемей тургъанланы  бирлерине  жашау журт-коммунал мюлк предприятияла саналадыла.

Быйыл Россейде МСП платформаны юсю бла 77 региондан тёрт мингден артыкъ предприниматель, къырал микрофинанс организацияладан ёнкючге 11,3 миллиарддан аслам сом алгъандыла.

Арт кезиуде къыралда ич туризм къыстау айный барады. Россейлиледен тышында, тыш къыраллы къонакъла да кёбюсюнде кеси машиналары бла жолоучулукъну сайлайдыла. Аны бла байламлы "Къоркъуусуз эм тынгылы автомобиль жолла" быйылдан башлап " Жашау этерге инфраструктура "  миллет проектни чеклеринде туризм объектлеге баргъан жолла тап эм къоркъуусуз болурча аслам иш этиледи.  

Шимал Кавказда гитче эмда орта предприятияла, РФ-ни МСП Корпорациясыны болушлугъу бла быйылны биринчи жарымында 5,76 миллиард сом кредит алгъандыла. Озгъан жылны ол кезиую бла тенглешдиргенде, ёсюм алты процент болгъанды, дегендиле КъМР-ни Экономиканы айнытыу министерствосунда.