Экономика

Къабарты-Малкъарда «Жашау этерге инфраструктура» миллет проектге кёре  жолла тап эм къоркъуусуз болурча аслам иш этиледи. Ол санда бу кюнледе  «Биринчи Лескен- Огъары Лескен – Ташлы-Тала – Хазнидон» жолну юч километр кесегин  жангыртып бошай турадыла, деп билдириледи КъМР-ни Транспорт эмда жол мюлк министерствосуну пресс-службасындан.

Быйыл жылны башындан бери Нальчикде жашагъанла хайырланнган электрокюч ючюн "Россети Северный Кавказ» - «Каббалкэнерго» биригиуге  6,8 миллиард  сом тёлегендиле.  Былтыр бу  заман тенглешдиргенде, ол 950 миллион сомгъа кёпдю.  Алай бла сагъынылгъан кезиуде тёлеулени ёлчеми 88 процентге жетгенди, деп билдириледи  «Россети Северный Кавказ» биригиуню  пресс-службасындан.

Быйыл "Иги шахар болумну къурау" къырал программагъа кёре Черек районда Къашхатаугъа, Огъары Жемталагъа, Жемталагъа эмда Герпегежге кирген жерледе стелала ишленнгендиле эм жангыртылгъандыла,  деп билдириледи КъМР-ни  Къурулуш эмда жашау журт -коммунал мюлк министерствосуну  пресс-службасындан.

Кёп болмай  Нальчикде «КАВКАЗ. РФ» биригиуню таматасыны орунбасары  Тимур Кебековну башчылыгъы бла  кенгеш бардырылгъанды. Анда баш тема  биригиуню республикада  резидентлерин   сынамлы кадрла бла жалчытыугъа аталгъанды, деп билдириледи «Иш кёллю Россей» жамауат организацияны Къабарты-Малкъарда бёлюмюню пресс-службасындан. 

Жыл санлары отуз бешге жетмеген, кеслери да креатив индустрияда къармашхан жаш предпринимательлени саны онбир процент болады. Тенглешдирип айтханда, ол аладан тамата къауумдан эки кереге кёпдю – анда бу бёлюмню жаланда беш проценти сайлайды, - дегендиле КъМР-ни Экономиканы айнытыу министерствосунда.

Быйыл биринчи юч кварталны ичинде МСП.РФ цифралы платформаны хайырланып кёп къалмай алты минг предприниматель 15,3 миллиарддан аслам сом ахча къоллу болгъандыла. Сёз мында учуз багъасы бла берилген аз ёлчемли займланы юсюнден барады.

КъМР-ни Къурулуш эмда жашау журт-коммунал мюлк министерствосундан билдиргенлерича, «Жашау этерге инфраструктура» миллет проектге кёре республикада    жашау этерге жарамагъан юйледен кёчюрюу программа тири барады.

Быйыл жылны башындан бери жашау журтладан 459,7 минг квадрат метрден аслам ишленнгенди. Ол былтыр бу замандан 1,3 процентге кёпдю, деп билдиргендиле Шимал-Кавказ статистика управленияны пресс-службасындан.

Быйыл кюз артында  Къабарты-Малкъарны аграрчылары  1 минг гектар чакълы бирде терек бахчалыкъла  орнатыр муратлары барды. Эсге сала айтсакъ, жаз башында мюлкледе  терекчиклени 550 гектарда салыргъа жетишгендиле.

Кюз арты жетип, халкъны бахчаларына къуугъанды. Бирде кюн тийсе, бирде жауун жауады, кюндюз жылы болса, кече хауа сууугъуракъды.