Экономика

Былтыр Май районда къолдан сатыу-алыуну ёлчеми 1,4 миллиард сомгъа жетгенди. Ол, буруннгу жыл бла тенглешдиргенде, 25,8 процентге кёпдю. Саулай алып айтханда, экономиканы бу бёлюмю жер-жерли бюджетге 10,5 процент файда келтиреди.

«Гитче эмда орта предпринимательство» миллет проект бардырылгъан кезиуде (2019-2024 ж.ж.) бизни республикада гитче эмда орта предпринимательство бла кюрешген тёрт жюзден артыкъ субъектге 6,3 миллиарддан аслам сом багъасына билеклик этилгенди. Жаланда былтыр бу амалны хайырын 27 субъект кёргенди. 

Россейни къыбыла регионларында озгъан эки айны ичинде туристлени саны кёпден-кёп бола баргъаны эсепге тюшгенди. Жангы жылны байрам кюнлеринде Шимал Кавказны курортларында буруннгу жылдан эсе аслам адам бар эди. Аны юсюнден Россейни Банкыны регионлада экономика болум бла байламлы докладында айтылады, дегендиле аны Къабарты-Малкъарда бёлюмюнде.

Былтыр Прохладный шахарда орналгъан "Кавказкабель" завод 5 минг чакълы кабель чыгъаргъанды. Буруннгу жыл бла тенглешдиргенде, ол 10 процентге кёпдю. Производствосун тёрт кереге кёбейтирге таукелди.

Къабарты-Малкъарны суу эм жылыу бла жалчытхан предприятияларыны «Россети Северный Кавказ» - «Каббалкэнерго» биригиуге кёп заманны тёлемегенлери ючюн борчлары 2,8 миллиард сомгъа жетгенди.  Алай бла ала республикада эм уллу борчлары болгъанлагъа саналадыла, деп билдириледи энергокюч биригиуню пресс-службасындан.

Россейни Ара банкыны Къабарты-Малкъарда бёлюмюнде былтыр бизни республикада неллай бир розница кредит берилгенин тийишдирип  эсеплерин чыгъаргъандыла. Тергеулеге кёре, ол кезиуде аллай кредитлени ёлчеми (портфель) 99 миллиард сомгъа жетгенди. Аны бла ол буруннгу жылдагъы кёрюмдюден жети процентге асламыракъ болгъанды.

Кёп болмай «Россети Северный Кавказ» - «Каббалкэнерго»- компанияны бёлюмюню башчысы Резуан Загаштоков бардырып,  балансла  комиссияны кенгеши болгъанды. Тюбешиуде ток бла жалчытхан организацияны объектлеринде къоранчланы азайтырча мадар этилирге кереклиси эмда башха соруула да сюзюлгендиле, деп билдириледи электрокюч бла жалчытхан компанияны пресс-службасындан.    

Организацияла, энчи  предпринимательле  эм кёп фатарлы юйледе  коммерциялы мекямланы  иелери хайырланнган  электрокюч ючюн энди  «Сбербанк Онлайн» деген  тюзюнлей  сервис бла тёлерге боллукъдула, деп билдириледи   «Россети Северный Кавказ» биригиуню  пресс-службасындан.

Аллай амал биригиуню бёлюмлерине  барып айланмазгъа,  аны бла бирге  заман къоратмазгъа онг береди. 

Аны ючюн  «Россети Северный Кавказ» - «Каббалкэнерго» биригиуню  "ИП эм Юрлица» бёлюмюне кирип,  келишимни номерлерин жазып   тёлерге жарайды.   

Кёп болмай Чегем районда КъМР-ни Транспорт эмда жол мюлк министерствосуну келечилери, эллени, профильли бёлюмлени таматалары къатышып ишчи кенгеш болгъанды. Ол регион магъаналы жолла мардалагъа келиширча  тийишли ишлени бардырыугъа жораланнганды, деп билдириледи Чегем районну администрациясыны пресс-службасындан.

КъМР-ни Правительствосуну порталында билдирилгеннге кёре 2024 жылда Къабарты-Малкъарда миллион тоннадан артыкъ алма жыйылгъанды. Бу тарих, 2023 жыл бла тенглешдиргенде, отуз процентге кёпдю. Бусагъатда бизни кюнлю, берекетли жерибизде ёсген алмала Россейни къыркъ тогъуз рагеонуна жибериледиле, 2023 жылда уа отуз алты регион бла бар эди келишим. Алайды да, Къабарты-Малкъарда жыйылгъан тирлик битеу да  къыралыбызгъа жайылады.