«Керти белги» - смартфонлада

Россейде сатыугъа чыгъарылгъан смартфонлада борчлу халда бир-бир программала аллындан окъуна орнатылып болуучудула. Аланы тизмесине энди «Керти белги» («Честный знак») деген приложенияны да къошхандыла. Ол хайырланыучулагъа иги шартды: бу программа товарланы эмда продукцияланы къадар тюрлюсюн къайда этилгенлерин, неден жарашдырылгъанларын, керти болгъанларын кёргюзтеди.

«Керти белги» система кийирилгенли бир ненча жыл болады. Бюгюнлюкде анда товарланы кёп тюрлюсю барды. Аны хайырындан жалгъан продукцияны сатыугъа чек салыргъа, сатыу-алыу къалай баргъанын толуракъ билирге, контрольну кючлендирирге болады. Дагъыда бу белги товар этилген жеринден башлап, алыучугъа дери жетгинчи кимлени къоллары бла ётгенин кёргюзтеди.

Товарны эмда аны жарашдыргъан предприятияны юсюнден толу информацияны билирча бу программаны смартфоннга орнатып, ызы бла аны ачып, продукцияны юсюнде маркировкагъа камераны бурургъа керекди.

Системада шёндю ма быллай затланы юслеринден информация барды: дарманла, сют, таза суу, сыра, табак, аякъ кийимле, тюклю тонла, женгил промышленность товарла, фотоаппаратла, чархла, медицина затла, антисептикле. Приложение аптекалада дарман табаргъа болушурукъду, сют къайсы фермада сауулгъанын кёргюзтюрюкдю, препаратны къачан хайырланыргъа кереклисин да эсге саллыкъды.

Алай бла энди жангы смартфонлада борчлу халда ма быллай приложенияла болургъа керекдиле: «Честный знак», «Яндекс.Браузер», «Яндекс.Карты», «2ГИС», «Яндекс.Диск», «Почта@Mail.ru», «VK Мессенджер», «Маруся», «Дзен», «RuTube», «ВКонтакте», «Одноклассники», Mir Pay, «Госуслуги», «МойОфис Документы», «Касперский free», RuStore, «ЛитРес».

Улбашланы Мурат хазырлагъанды.
Поделиться: