Хунерлерин устазларына жораларыкъдыла

Октябрьни оналтынчысындан башлап жыйырма экинчисине дери «Культура школчулагъа» атлы ведомствола аралы маданият – билим бериу проектни чеклеринде «Устазлагъа жоралау» деген ат бла Битеуроссей акция бардырылады. Ол Устазны бла насийхатчыны жылына аталып къуралгъанды.

Бу жумушха къатышыр ючюн а устаз бла бирге берилген эки ыздан биринде чыгъармачылыкъ ишни хазырларгъа керекди. Алай бла биринчисинде – «Поэзияда» - школчу сюйген назмусун къалай окъугъаны видеороликге жаздырылады.

«Музыка» ызда уа сабий музыка школлагъа бла бирси къошакъ билим берген махкемелеге жюрюгенле окъутхан педагоглары бла бирге инструментде сокъгъанларын неда жыр айтханларын кёргюзтюрге тийишлидиле (ол да видеороликде).

Видеороликни уа «ВКонтакте» социал сетьде кесинги энчи неда окъуу огъесе культура махкемени страницасында салыргъа тийишлиди. Постну текстинде уа регионунгу (область, край, музыка), тукъумунгу, атынгы жазаргъа эмда #учителькдш хештегни белгилерге  керекди. Страница аны иеси бла байламлыкъ чырмаусуз тохташдырылырча болургъа борчлуду.

Акцияны эсеплерине тийишлиликде жюрини келечилери музыка эмда поэзия жаны бла отузушар эм сейир ишлени сайларыкъдыла. Хорлагъанла уа сертификатла, «Культура школчулагъа» проектни саугъалары  бла да белгиленирикдиле. Андан тышында да, эм иги ишле жыйымдыкъ видеороликге къошуллукъдула эмда «Культурадляшкольников РФ» порталда басмаланырыкъдыла.

Алчыланы атлары тёртюнчю ноябрьде билинирикдиле. Сертификатла уа, жаланда алагъа угъай, битеу да бу жумушда хунерлерин кёргюзтгенлеге берилликдиле.

Акцияны чеклеринде Россейни культурасыны, искусствосуну да сыйлы ишчилери кеслерини устазларыны бла насийхатчыларыны юслеринден хапар айтырыкъдыла. Аланы чыгъармачылыкъ бла байламлы болурларына  кимле себеплик этгенлерин да билдирликдиле.

Проект Рф-ни Культура министерствосуну, РФ-ни Жарыкъландырыу министерствосуну, РОСКУЛЬТПРОЕКТ-ни, «Культураны россейли фонду» ООГО-ну башламчылыкълары бла къуралгъанды.