Халкъ юйюне – Россейге къайтыр муратын толтургъанды

30 сентябрьде жангы регионла Россейге  къайтарылгъанларыны кюню биринчи кере белгиленнгенди. Бу тарых магъаналы ишге быйыл бир жыл толгъанды. Статьяда уа бу кезиуню ичинде болгъан ишлени эсгертирге сюебиз.

Былтыр 30 сентябрьде Донбассда, Херсон эм Запорожье областьлада халкъны арасында соруу бардырылып, ала Россейге къайтыуну сайлагъандыла. Ол тарых магъаналы жумушха жораланып, РФ-ни Президенти Жангы регионланы Россей Федерациягъа къайтханларыны кюнюн тохташдыргъанды.

Энчи аскер операция башланнган биринчи кюнден «Единая Россия» партия жандауурлукъ жумушланы толтургъанды. Партияны Къырал Думада фракциясыны депутатлары ЛДНР, Запорожье эм Херсон областьланы РФ-ни праволу системасына сингдириу, социал эм къырал себепликни  мадарларын кенгертиу жаны бла законланы хазырлагъандыла. Аны бла бирге партияны келечилери соруу бардырылгъан кезиуде жамауат къараучула болгъандыла.

- Жангы регионланы халкъы не заманда да кеслерин Россейни кесегине санагъандыла. Референдумну кезиуюнде тириликлери  ала тарых тюзлюк тохташдырылырын сакълагъанларына шагъатлыкъ этеди. Ала хар кюн да деменгили къыралыбызны билеклигин сезедиле, мамыр жашау къайтханын  кёредиле, кеслери да тынчлыкъны жалчытыугъа къатышадыла. Къурулушла бардырыладыла, жангы субъектлени къыралны жашаууна сингдириу тири барады, жангы онгла къураладыла. Сёзге, Цифралы айнытыу министерство «Единая Россияны» башламчылыгъы бла «Мен Россейдеме» порталны къурагъанды. Аны болушлугъу бла къырал жумушланы толтурургъа боллукъду. Биз юйреннген кёп мадарла алгъын Донбассда ишлемегендиле, бюгюнлюкде уа адамланы жашау болумлары игилендириледи, жангычылыкъла сингдириледиле, онгла къураладыла,-дегенди «Единая Россияны» Ара толтуруу комитетини башчысы Александр Сидякин.

Аны айтханына кёре, партия адамлагъа жандауурлукъну тохтатмайды, аш-азыкъ, къурулуш материалла, дарманла жетдириледиле, ала бла бирге къыйын жашау болумгъа тюшгенлеге, сабийлеге  керекли болушлукъ бериледи.

- Бу кезиуде биз 76 минг тонна жюк келтиргенбиз.Тёрт регионда да аланы юлешген энчи жерле къуралгъандыла, ЛНР-де уа къошакъ жер да къуралгъанды, аны партия «Ридовка болушады» фонд бла бирге ачханды. Партияны жаш гвардиячылары, «Волонтёр рота», аланы тизгинлеринде уа 2,5 мингден аслам жаш адам турадыла, жандауурлукъ жюкню ташыу бла чекленип къалмайдыла. Ала социал мекямланы, жашау журтланы жангыртыргъа болушадыла, субботникле бардырадыла. Ала бла  бирге бу ишге республиканы жамауаты да тири къатышады,-деп къошханды Сидякин.

Ол партия биринчилени санында регионлада бёлюмлерин ачханын да эсгертгенди. Бюгюнлюкде «Единая Россияны» тизгинлерине жангы субъектледе 160 минг адам киргендиле. Партия, аны келечилери   жангы регионлада ишни къуралыулу бардыргъанлары, халкъ программаны къурагъанлары уа айырыулагъа себеплик этгендиле - «Единая Россия» жанлы къол кётюргенлени саны аслам болгъанды. «Ол а бизге уллу жууаплылыкъла салады, ол санда экономиканы аягъы юсюне этиу,  жамауатха социал болушлукъ жаны бла да. Биз бу сорууланы тамамлап башлагъанбыз: халкъ программаны чеклеринде, шеф болушлукъ этген регионла   бла бирге школла, саулукъ сакълау учрежденияла, сабийле ойнарча майданла, жолла  ишлетиледиле.  Партия проектлени болушлугъу бла спорт залла ачыладыла. Сёзге, самбодан жараула бардырырча. Инфраструктураны жангыртыу, инсанлагъа билеклик этиу партияны баш борчларындан биридиле»,-деп чертгенди Александр Сидякин.

Жангы регионланы Россейге къайтханлары къыралгъа жангы онгла бергенин да белгилегенди партияны келечиси. Ол санда промышленностьда, аш-азыкъ къоркъуусузлукъну жалчытыуда.

Бу кюнледе уа Къырал Дума «Единая Россия» хазырлагъан законну проектин биринчи окъулууда къабыл кёргенди. Анга тийишлиликде, жангы регионлада промышленный паркланы къурауну низамы женгиллетилликди. «Алай бла инвесторлагъа жангы онгла ачыллыкъдыла, адамла ишчи жерле бла жалчытылынырыкъдыла, экономиканы къошакъ файдалары боллукъду. ДНР-де уллу холдинглени айнытыргъа белгиленеди: Харцызск завод, Силур, Донпромкабель, Донецкгормаш, «Азовэлектросталь», «Энергоспецмаш». Кёмюр, жер тюбюнде башха табийгъат  хазнаны чыгъарыу да жангыртыллыкъдыла, эл мюлк айнытыллыкъды»,-дегенди Сидякин.

ДНР-ни Халкъ советини башчысы, «Спарта» батальонну командири Артём Жога   халкъ юйюне – Россейге къайтханын, аны  кёп заманны сакълагъанын чертгенди. Ол  адамла къыралны жанындан къайгъырыулукъну сезгенлерин да айтханды, украинлы властьны заманында аллай онглары болмагъанын белгилегенди.

- Инсанланы социал гарантиялары, билим алыргъа онглары барды. Ёсюп келген тёлюню ата-бабаларыбызны, Уллу Ата журт урушда жигитлени юлгюсюнде ёсдюрюрге эркин болгъанбыз. Биз  аны 9 жылны сакълагъанбыз. Мен кесим да россейли жамауатха къошулуруму, РФ-ни инсаны болуруму, эркинликлерим бузулмай жашарымы кюсеп тургъанма. Динни сайларгъа, ана тилимде сёлеширге сюйгенме. Ол 2014 жылда къолларына сауут алгъанланы барысыны да муратыды. Ол толур ючюн кёпле жанларын бергендиле,-дегенди ол.

«Единая Россияны» КъМР-де бёлюмюню секретарыны орунбасары, партияны толтуруу комитетини башчысы, КъМР-ни Парламентини депутаты Дмитрий Парафилов KABARDIN-BALKAR.ER.RU сайтха айтханыча, жангы регионланы Россейге къайтханларыны кюню тохташдырылгъаны артыкъда магъаналы жумушду.    

- Къыралыбызны жангы тарыхында бу кюн энчи жерни алгъанды. Ол эркинликни, тюзлюкню белгисиди. Жангы регионланы онглары, кючю, байлыгъы адамладыла. Ала уа жигитликни, туугъан журтха сюймекликни, къатылыкъны юлгюсюн кёргюзтгендиле. «Единая Россия» энчи аскер операция бардырылгъан биринчи кюнден фронтха, регионну жамауатына, андан кёчгенлеге  къолдан келгенича болушады.  Бёлюмде хар кюн да жандауурлукъ жюкню къурау жаны бла мадарла толтуруладыла. Андан сора да, регионладан кёчюп келгенлени жашау болумларын къурау мадарла бардырабыз, Херсон областьдан сабийлени солууларына энчи эс бурулады. Республика шеф болушлукъ этген Скадовск шахарны инфраструктурасын жангыртыу жаны бла мадарла да толтурады,-дегенди Дмитрий Парафилов.