Элбрус районну каратечилеринде – аслам майдал

«Петербург кюз» деген ат бла шимал ара шахарыбызны «Экспофорум» арасында битеукъырал эм халкъла аралы эришиуле бардырылгъандыла. Алагъа Россейни 46 регионундан, Египетден, Сербиядан, Ирандан, Иракдан, Узбекистандан, Таджикистандан эм талай башха къыралдан мингнге жууукъ спортчу къатышхандыла.  

Халкъла аралы эришиуледе 18 жыллары толгъан эм андан абадан спортчула сынашхандыла, анда Элбрус районну олимпиада резервли спрт школуну келечилери жетишимли болгъандыла. Беш сермеш бардырып, «кюмюшню» Андрей Вихорь (75кг.) алгъанды. 67 килограммда эм абсолютный ауурлукъда ючюнчю жерлеге Керим Алихаджиев чыкъгъанды.

 Битеуроссей эришиуледе уа Ислам Юнусов (55кг.) бла Къурманланы Каншао-Бий къууандыргъандыла, ала экиси да, бешишер тюбешиу бардырып, кюмюш майдалла бла къайтхандыла.

Спортчуланы тренерле Руслан Нахушев, Евгений Могилевец, Владимир Юнусов юйретедиле.