Кёп бёлюмледе ёсюм эсленеди

Быйылны биринчи жарымына Къабарты-Малкъар Республиканы социал бёлюмюню бла экономикасыны айныууну эсеплери чыгъарылгъандыла. Алагъа кёре, баш макроэкономика кёрюмдюле иги болгъанлай къаладыла. Эл мюлкде, жарашдырыучу промышленностьда, жашау журтла эмда жолла ишлеуде, сатыу-алыуда ёсюм эсленеди. Республиканы кеси файдаларына да къошула барады. Бюджет ахчагъа ишлегенлени хакълары да 2019 жылдан бери аз-аздан  кёбейеди. Республикада жашагъанланы файдаларыны ёсе барыулары жаны бла КъМР алчылыкъны тутады. Ала быйылны биринчи жарымында 15,7 процентге ёсгендиле.

Туризм да терк атламла бла айныйды. Январьдан августха дери  туристлени саны 1,1 миллионнга жетгенди. Ол а былтырны бу кезиуюнден 20 процентге асламды. Элбрус Россейни солургъа иги онглары болгъан беш табийгъат тийрелеринден бирине саналады.  Модуль къонакъ юйле къураугъа республикагъа 573 миллион сомдан аслам бёлюнюрюкдю. Нальчикде да туристлеге къошакъ жерле къураргъа белгиленеди. Бюгюнлюкде къонакъ юйле бла байламлы беш уллу проект бардырыла турады.

Россейни Президенти Владимир Путинни башламчылыгъы башланнган миллет проектле инсанланы жашау болумларын игилендирирге себеплик этедиле. Тогъуз мектеп, 9 маданият мекям, 52 сабий сад ишленнгендиле,  14 багъыу учреждение жангыртылгъанды, жолланы 830 километри тап халгъа келтирилгендиле. Миллет проектле бла байламлы ишле андан ары бардырыладыла. Инфраструктура объектле, жашау журтла, жолла ишленедиле, 80-ден артыкъ уллу объект жангыртылады эмда айбатландырылады. Миллет проектлени толтуруугъа республикагъа  11 миллиард сомдан артыкъ бёлюннгенди. Битеу бу шартланы КъМР-ни Башчысы Казбек Коков Россейни Президентини СКФО-да толу эркинликли келечиси Юрий Чайка бла бу кюнледе Пятигорскда болгъан тюбешиуюнде туура этгенди.