Байрамлада хата чыкъмазча

Промышленный продукцияны законсуз сатыу-алыуны тохтатыу жаны бла къырал комиссияны жыйылыуунда пиротехника продукцияны чыгъарыугъа, сатыугъа чек салыуну мадарларын белгиленнгендиле, деп билдириледи МЧС-ни официал сайтында.

Сюзюулеге федерал эм регион толтуруучу власть органланы келечилери да къатышхандыла. Россейни МЧС-ини башчысы Александр Куренков билдиргенича, жыл сайын къыралда пиротехника керекле тургъан жерледе от тюшгенини саны талай жюзге жетеди. «Аладан а от башха жерлеге кёчерге да болады. Ведомство фейерверкле сакъланылгъан жерлени дайымда эсепде тутадыла, бир жылгъа 14 мингден аслам тинтиу бардырадыла. Алай аланы интернет-тюкенледе, маркетплейследе сатыу, курьерле неда почта бла жибериу уллу проблемаладан бириди. Пиротехника затланы быллай эм башха амалла бла сатыугъа чек салыр ючюн, аланы идентификациягъа тийишли товарланы санына къошаргъа керекди», - деп чертгенди ол.

Къошакъ излемле пиротехниканы чыгъаргъан, ала бла сынаула ётдюрген эм багуш жыйылгъан жерледе бастыргъан, алай бу жумушланы тамамларгъа лицензиялары болмагъан организациялагъа да салынырыкъдыла. Битеу бу мадарла фейерверклени законсуз сатыу-алыуну тыярыкъларындан тышында, битеу къыралда да бу жаны бла болумгъа багъа бичерге болушурукъдула. Этилген эсгертиулени жашауда бардырыргъа МЧС, Промышленность эм сатыу-алыу, Экономиканы айнытыу министерствола, сейирлери болгъан власть органла бардырлыкъдыла.