Таулада ажашмазча

Бу кюнледе республиканы тауларында 1069 адамдан къуралгъан 141 турист къауум эсепге тюшгендиле, аладан 6-сы тыш къыралладан къауумладыла, битеу да 19 инсан.

МЧС бийикликледе адамланы жашауларына бла саулукъларына къоркъуу уллу болгъанын эсгертеди. Мында кюнню халы терк тюрленеди, кюн тийип тургъанлай жел суху урургъа, къар, боран башланыргъа боладыла. Бийикликле терк тюрленнгенде, жылы сууукъгъа терк айланнганда, ультрафиолетни ёлчеми ёсгенде, адам кеси да къыйналады, «тау ауруу» башланыргъа болады.

Туристлени къоркъуусузлукъларын жалчытырча, ала къыйын болумгъа тюшгенде болушлукъгъа терк чыгъарча МЧС аланы жолоучулукъларын эсепге салыргъа чакъырады, ол жумушну интернетни амалы бла https://forms.mchs.gov.ru/registration_tourist_groups сайтда толтурургъа да жарайды. Анда солугъанла къаллай жол бла барлыкъларын, не мурат бла келгенлерин, маршрутдан артха къачан къайтырыкъларын, байламлыкъ жюрютюрча биргелерине къаллай связь амалланы алгъанларын эм башха магъаналы шартланы билдиредиле. Бир тюрлю сылтау бла жолларын тюрлендирселе, къауумну башчысы аны юсюнден къутхарыучулагъа айтыргъа борчлуду.

МЧС-ни Элбрус бийик тау излеу-къутхарыу отряды Терс-Къолда орналыпды, аны телефонлары: 8(86638) 7-14-89, 8-928-694-51-19.