Дарманладан сора башха амалла да хайырлыдыла

Нальчикде «Бубновскийни арасы» ачылгъанлы анда кёпле саулукъларын игилендиргендиле. Сергей Михайлович Бубновский дунияда аты айтылгъан докторду. Алай ол саусузланы дарманла бла угъай, кеси къурагъан тренажёрла бла багъады. Ол  къурагъан арала Россейни кёп шахарында ишлейдиле.

Ол интернетде видеороликлеринде:  «Мен  алыкъа  саусуз  дарманла  бла  аурууун  хорлап  кёрмегенме, тренажёрла уа  саулукъну къайтарадыла»,-дейди. Докторну  оюмуна  кёре,  остеохондрозну,  артрозну,  артритни  хаталарындан  башха  ауруула  да чыгъадыла: гипертония, аденома, миома, аш орунда жарачыкъла, жюрек да кереклисича ишлемейди.  Аладан къыйналыуну  сылтауун  кетерирге  керекди.  Сырт  сюек,  адамны  башха  сюеклери, шаугютлери тап халда  эселе,  ол  къууанып  жашарыкъды.  Алай  болур  ючюн  а,  къымылдаргъа  керекди.  «Къымылдау  –  жашауду»,-дейди  Бубновский.  Аны  оюмуна  кёре,  медицинада  магнатла  бусагъатда байыкъланыргъа сюедиле ансы,  саусузгъа    болушургъа  итинмейдиле:  ахырысы  бла  да,  керексиз  дарманла  жазыладыла,  саусузлагъа  хайыры  болмагъан процедурала этиледиле. Мингле  бла  атлаялмагъан  адамланы аягъы юсюне салгъан доктор  акъылбалыкъ  болмагъанланы  сюеклерине  тиерге  керек  тюйюлдю,  дейди.  «Сюекге  операция сабий ёсюп бошагъандан сора этерге керекди», -деп алайды  белгили докторну оюму.

Кертиси  бла  да,  биз  къыйын  ауругъан адамны жаланда дарманла неда операция сау этерик сунабыз.  Алай  дунияда  медицинаны  кёп  тюрлю  ызлары  бардыла,  саулукъгъа  жол  бир  тюйюлдю, дармансыз амалланы хайырлана билирге да  керекди. Кёп  врачла  инфарктдан,  инсультдан сора саусузлагъа тепмей жашагъыз, дейдиле. Бубновский аны  терсге  санайды.  «Тепмей  жашау  - ёлюмге жууукълашыуду. Жеринде  туруп  тургъан  адамны  шаугютлери  бошайып  къаладыла».

Докторну  оюмуна  кёре,  хар саусузгъа багъыу энчи низамгъа кёре  бардырылыргъа  керекди.  «Биреуню  томография  суратына  къарасанг,  бу  алыкъа  саумуду деригинг келеди, ол а тири окъунады.  Башханыкъына   къарасанг а – хар заты да тапды, ол  а  ёле  турады.  Мен  заочный консультацияланы  аны  ючюн  бермейме.  Томография  ол  игиди,  алай врач саусузну къоллары бла да тинтеди»,-дегенди Бубновский. Ол  дармансыз  медицина  бек  эрттегили болгъанын, аны тамырлары Гиппократха баргъанларын чертгенди. Къол  бла  тинтиу  къалай  болгъанын кёргюзтюр ючюн,   бир видеосунда саусуз аппагъа къарайды.  Аны  айтханына  кёре,  тобугъу  асыры  ауругъандан,  ол  юч  айны  жукълаялмай  тургъанды. Алай Нальчикде «Бубновскийни  арасында»  багъыу  курсдан сора бир кесек онг тапханды, жукълап да башлагъанды. Доктор бу саусузну аякъларын-къолларын ары-бери созуп, ачыгъанына  –  ачымагъанына  кёре  диагноз  салгъанды. 

Сергей Михайлович  «Париж Дакар» эришиулеге  къатышхан  бизни  алты  спортчубузну   сырт  сюеклери  сыннгандан  сора  бакъгъанды,  ала  артда эришиуледе хорлап тургъандыла.  Арагъа Нальчик шахарда бек кёп адам жюрюйдю. Ала бла тюбешип ушакъла да бардыргъанбыз. Кёбюсю бери поликлиникалада болушлукъ тапмагъандан сора келгендиле