Жандауурлукъну чеги жокъду

21 августа, 2019 - 08:16

Кёп болмай санларында къыяулары болгъан эмда ауруулу сабийлеге болушлукъгъа  Нальчикде  Профсоюзланы къаласында  акция бардырылгъанды. Аны Залим Алакаев башчылыкъ этген   "Жандауурлукъну макъамлары" деген фонд  къурагъанды.  Анга республикада атлары кенг белгили жырчыла эмда юлгюлю сабий  тепсеу коллективле къатышхандыла.  Артистле эки сагъатны ичинде  жырлап, тепсеп, келгенлени кёллерин кётюрюу бла чекленип къалмай, 123. 700 сом да жыйгъандыла. Ол ахча толусунлай  саусуз къызчыкъгъа операциягъа къоратыллыкъды.

Залим Алакаев билдиргеннге кёре, фонд  быллай тюрлю  концертлени терк-терк бардырып, аладан тюшген  ахчаны  тийишли  жерге ётдюреди. Анга бу огъурлу ишинде  экинчи группалы инвалид Астемир Хатуев  къурагъан "КъМР-де чемер къолла" деген жандауурлукъ  организация уллу себеплик этеди.

-Мени кесими да саулугъум осалды, алай  онгсуз сабийчиклени кёрсем, жюрегим тёзалмайды. Жамауат организацияны алагъа къолумдан келген болушлукъну этер ючюн къурагъанма. Бизге себеплик этгенле да кёпдюле. Сау болсунла,-дейди Астемир.

Холаланы Марзият.
  • 22 просмотра
Поделиться: