Отлукъгъа багъаланы болуму сюзюлгенди

Къабарты-Малкъарны Правительствосуну Председателини биринчи орунбасары Сергей Говоров республикада эл мюлк товарла чыгъарыучуланы отлукъ бла жалчытыуну эмда рынокда анга багъаланы  юсюнден кенгеш бардыргъанды.

Сагъынылгъан темалагъа эл мюлк министрни орунбасары Мачраил Шетов эмда промышленность, энергетика эм сатыу-алыу министр Шамиль Ахубеков да сёлешгендиле. Ала отлукъ бла жалчытыу не халда болгъаны сюзюлгенин эмда быйыл аны сатып алыу план жарашдырыллыгъын билдиргендиле. Ушакъгъа отлукъ компанияланы келечилери да къатышхан эдиле.

Багъалагъа эмда нефть продукцияны  къыстырыгъына эс бурулгъаныны  юсюнден Монополиялагъа къажау федерал службаны Къабарты-Малкъарда Управлениясыны (УФАС) башчысы Анна Кумахова айтханды. Ол билдиргенича, управление болумну эмда багъаланы кюн сайын сюзгенлей турады. Бегирек да рынокда аслам юлюшню алгъан субъектлени ишлерине къарайды. Ахыр эсеплеге кёре нефть продуктладан къытлыкъ жокъду. Сатыучула да багъаланы кётюрмезге кюрешедиле, дегенди ол.

Къалай - алай болса да, бензинни багъасы Шимал Кавказны битеу регионларында кётюрюле барады. Бизни республикада ол орта мардадан озмайды. Отлукъ къуйгъан станциялада уа тюрленедиле - ол аланы онгларына кёре къуралады. Саулай къыралда отлукъгъа къытлыкъ болгъаны, туристле аслам халда келип башлагъанлары, бензин ташыгъан компанияла бла да жангы келишимле этерге тюшгени багъаланы ёрге чыгъарады.

Газ отлукъ бла да иш алайды. Управление аны эмда бензин сатыучу компаниялагъа ол не хыйсапдан  болгъанын сорады. «Бир тюрлю сылтау болмай багъаланы кётюрюп баргъанланы къапха жыярча монополиялагъа къажау туруу жаны бла амал табыллыкъды»,-дегенди  Анна Кумахова.