Харкюнлюк ишлерин бет жарыкълы толтура

Кеслерине медицина усталыкъны жюрек излемлери бла сайлап, жамауатдан ыразылыкъгъа, хурметге да тийишли бола ишлеген эгеч-къарындашларыбыз асламдыла. Ала къолларындан келгенни, билимлерин да аямай кюрешгенлерини хайырындан а, дуния пандемия болумланы къужур кезиуюне тюшюп къалгъанда да, халкъ алагъа ышаннганды. Акъ халатны киерге, биреуню саулугъу, бирде уа жашауу ючюн окъуна жууаплылыкъны боюнуна алыргъа бош анстан сайлау этмегенлерин да ачыкълагъандыла врачларыбыз, медсестраларыбыз, бирси медицина ишчилерибиз.

Ариу тау эллерибизде да эллилерини аллында харкюнлюк ишлерин бет жарыкълы толтура, иш кёллюлюклери, адамлыкълары бла да кеслерине илешдире, биреуден керексиз махтау излемей, жаланда бу мени усталыгъымды, аны уа айыпсыз этерге тийишлиме деген акъыл бла уруннганларыбызны барлыгъы бизни да кёлюбюзню кётюреди. Мечукъаланы Лариса да аллайларыбыздан бириди.

Бюгюнлюкде ол Лашкутаны эл амбулаториясыны фельдшериди. Мында кёп къалмай отуз жылны ишлеп келеди. Ары дери уа анга Нальчикни медицина училищесин къызыл диплом бла бошагъанындан сора, распределение амал бла Быллымда беш жылны, ызы бла уа Жанхотияны амбулаториясында урунуругъа тюшгенди. Ол отуз тёрт окъуучуну арасында айырмалы дипломгъа тийишлиге саналгъан жетеуленни арасында болгъаны уа, аны жаланда кесин угъай, ата-анасын, окъутханларын да къууандыргъанды. КъМКъУ-гъа кирип, билимин андан ары ёсдюрюрге сюйген эсе да, къадар башха тюрлю оноу этгенди.

Лариса Лашкутада атасы Мамайланы Ахматны бла анасы Менлижанны уллу юйюрлеринде, ала уа тёрт сабий болгъандыла, бир бирге намысха, хурметге да юйрене ёсгенди. Баям, медицинагъа сюймеклиги уа анга ыннасы Мариямдан келген болур. Огъурлу тиширыу жаралары болгъанлагъа, ирин къыйнагъанлагъа дарман эте билгенди. Жаланда адамлагъа угъай, бу жаны бла эллилени малларында да къарар зат болса, билген амалын аямагъанды. Аны халаллыгъын а ала бюгюн да эслеринде тутуп, ыразылыкъ бла эсгередиле.

Эм биринчи ишлеп башлагъан кезиулерин эсгере, Лариса Ахматовна Элбрус районну ара больницасыны баш врачы Байдаланы Ахмат Батталовични, Быллымда амбулаторияны врачы Этезланы Алий Хажбекировични ишни эбине тюшюндюргенлерини, хар затха эс буруп юйретгенлерини юслеринден айтады. Бюгюнлюкде уа сагъынылгъан больницагъа Тилланы Хабибуллах таматалыкъ этгенин эсгерте, элледе амбулаториялада иш тап къуралырча къолундан келгенни этгенин чертеди. Заманында дарман, бензин, хар бирси керекле табылгъанлай тургъанларына къууанады. Терк болушлукъ берген машинаны барлыгъыны къаллай бирге дери себеплик болгъанын ангылатады. Коронавирусну кезиуюнде Хабибуллах Илиясович ауруугъа къажау кюрешгенлери ючюн саулукъ сакълауда уруннганлагъа эс бургъанлай, кёллерин кётюргенлей тургъаны ючюн да ыспас этеди.

Пандемияны кезиуюнде Мечукъаланы келинлери къалай ишлегенин а аны эллилери бизге, редакциягъа да, билдирген эдиле. Эсигизге салайыкъ, ала къараргъа тийишли тизмеде уа 750 адам барды. Лариса Ахматовна кечеди, кюндю демей, билген амалын-мадарын аямай, саусузланы къатларындан кетмей къарагъанды. Кеси да бу ауруудан эки кере къайтып къыйналгъанды. Болсада ол эм алгъа эллилери ючюн жарсыгъанды, ала манга ышанып тургъанда, не да этип, аланы инжилгенлерин селейтирге, жанларын сакълап къалыргъа мадарланы этгенлей турургъа керекме дегенлей ишлегенди. Аны ючюн а аланы жанындан хурмет, намыс-сый да тапханды.

– Биз ол кезиуде къалай ишлегенибизни унутхан къыйынды. Фронтдача ишлегенбиз десек да, къыйынды ангылатыргъа. Аскер хазырлыкъдача, тюз да ма алай тургъанбыз энди ким чакъырады деп. Бизге бу кезиуде уллу болушлукъ этип тургъан тиширыуну, Чеченланы Фатима Тахировнаны сагъынмай болмайма. Ол Бедикни амбулаториясында ишлейди. Анга барыбыз да ыразыбыз, себеплик этгенлей тургъаны ючюн сау болсун, – дейди ушакъ нёгерим.

Коронавирусха къажау сюелгени ючюн Лариса Ахматовна КъМР-ни жюзжыллыгъыны юбилей майдалы, Элбрус район больницаны бла администрацияны грамоталары, ыспас къагъытлары бла да саугъаланнганды. Алай эсе да, анга эм уллу саугъа аны къатында жашагъан, билген, кесини ёз юйюрюнде адамларынча багъалагъан эллилерини жюрек ыразылыкъларыды, ариу сёзлериди.

Усталыкъ атламларыны биринчи кезиуюнде уа юйде туууп къалыргъа тюшген къагъанакъчыкълагъа аначылыкъ да этген эди. Врачла жетгинчи,  хар нени да тынгылы эталгъанына, ол сабийле бюгюнлюкде ёсюп, энди кеслери да юйюрлю-юйдегили болгъанларына къууанады. «Медицина айный барады дей эсек да, бу усталыкъны сайлагъанны боюнундагъы жюгю уа ауурлай къалады – ол адамны жашауу ючюн жууаплылыкъды. Сен къаллай дарман бергенинге, не амалны кимге, къалай хайырланнганынга да уллу сакълыкъда болгъанлай турургъа борчлуса», – деп ангылатады.

Лариса Ахматовнаны юйюр насыбы да тутханды. Баш иеси Исмайыл бла бир классда окъугъандыла. Эки жашны ариу къылыкълыла этип ёсдюргендиле, билим да алдыргъандыла. Бюгюнлюкде Азамат бла Айсейир бирер жерде бет жарыкълы болуп урунадыла.

Огъурлу тиширыу а юйюр насыбы ючюн къайын ата-анасына ыразылыгъын айта, алагъа ариу жаннетни тилейди. Таллюу бла Фатимат а сегиз сабий ёсдюргендиле. Аланы барысын да иш юсюнде чыныгъыулукъда, уллугъа-гитчеге да хурметде, жандауурлукъда юйрете, юйюрлерине сакъ болурларына да тюшюндюргендиле.

Лариса Ахматовна да аланы бир ариу сёзлерин, халал ниетлерин да унутмайды. Ёз анасы Менлижанны уа къатында барлыгъына къадарына шукур эте, аны кесине эм уллу насыпха санайды.